న్యూఢిల్లీ:, 01 సెప్టెంబర్ (హి.స.)

విద్యార్థుల మానసిక ఉల్లాసం, సంక్షేమం కోసం ఐఐటీ కాన్పూర్ (IIT Kanpur) మరియు ప్రముఖ ఆధ్యాత్మిక సంస్థ 'ఇస్కాన్' (ISKCON) మధ్య జరిగిన ఒక అవగాహనా ఒప్పందం (MoU) తీవ్ర వివాదానికి దారితీసింది. ఒక ప్రభుత్వ విద్యా సంస్థలో ఇటువంటి కార్యక్రమాల కోసం మతపరమైన సంస్థను భాగస్వామ్యం చేయడంపై సోషల్ మీడియాలో తీవ్ర విమర్శలు రావడంతో, ఐఐటీ కాన్పూర్ తన అధికారిక ప్రకటనను వెనక్కి తీసుకుంది.

గత శనివారం ఐఐటీ కాన్పూర్ తమ ఎక్స్ (X) ఖాతాలో ఒక పోస్ట్ చేస్తూ.. విద్యార్థుల కోసం ఇస్కాన్ సంస్థతో రెండేళ్ల కాలపరిమితి గల ఒప్పందంపై సంతకం చేసినట్లు ప్రకటించింది. ఆసక్తి ఉన్న విద్యార్థుల కోసం ఈ సంస్థ స్వచ్ఛంద విద్యా, సంక్షేమ కార్యక్రమాలను నిర్వహిస్తుందని పేర్కొంది.

సర్టిఫైడ్ కోర్సులు - స్వచ్ఛంద భాగస్వామ్యం:

ఈ ఒప్పందం ప్రకారం, ఇస్కాన్ సంస్థ ఐఐటీ కాన్పూర్ విద్యార్థుల కోసం సెల్ఫ్ మేనేజ్‌మెంట్, వెల్‌నెస్, పర్సనల్ డెవలప్‌మెంట్, ఒత్తిడి నివారణ (Stress Management) మరియు ఆత్మవిశ్వాసాన్ని పెంపొందించే పలు సర్టిఫైడ్ కోర్సులను ఆఫర్ చేస్తుందని సంస్థ తెలిపింది. ప్రతి కోర్సులో ఎనిమిది గంటల సెషన్లు ఉంటాయని, ఇందులో పాల్గొనడం పూర్తిగా విద్యార్థుల ఇష్టానికే (స్వచ్ఛందంగా) వదిలేస్తున్నట్లు స్పష్టం చేసింది.

వెనక్కి తగ్గిన ఐఐటీ.. కానీ ఒప్పందం రద్దు కాలేదు:

ఈ ప్రకటనపై పూర్వ విద్యార్థులు, సామాజిక మాధ్యమాల వినియోగదారులు మరియు నెటిజన్లు పెద్ద ఎత్తున అభ్యంతరం వ్యక్తం చేస్తూ విమర్శలు గుప్పించడంతో సోమవారం నాడు ఐఐటీ యాజమాన్యం ఆ సోషల్ మీడియా పోస్ట్‌ను తొలగించింది. అయితే, ఐఐటీ కాన్పూర్ డైరెక్టర్ ప్రొఫెసర్ మనీంద్ర అగర్వాల్ ఈ నిర్ణయాన్ని సమర్థించారు. విద్యార్థి సంఘం (Students' Body) చొరవతోనే ఈ ఒప్పందం జరిగిందని ఆయన వెల్లడించారు.

క్యాంపస్‌లో మానసిక ఒత్తిడి, ఇబ్బందులు ఎదుర్కొంటున్న విద్యార్థులకు సహాయం చేయడానికి మేము అనేక కార్యక్రమాలను నడుపుతున్నాము. ఏ వెలుపలి సంస్థ అయినా సహాయం చేయడానికి ముందుకు వస్తే, మేము దానిని స్వీకరిస్తాము అని ఆయన పేర్కొన్నారు. సోషల్ మీడియా పోస్ట్ తొలగింపుపై స్పందించడానికి నిరాకరించిన ఆయన, ఇస్కాన్‌తో కుదుర్చుకున్న ఒప్పందం (MoU) మాత్రం కొనసాగుతుందని స్పష్టం చేశారు.

ఇటీవల ఐఐటీ ఢిల్లీ (IIT Delhi) లో ఒక విద్యార్థి ఆత్మహత్య చేసుకోవడం, విద్యార్థుల మానసిక ఆరోగ్యంపై దేశవ్యాప్తంగా పెద్ద ఎత్తున చర్చ నడుస్తున్న తరుణంలో ఈ వివాదం తెరపైకి రావడం గమనార్హం.

---------------

హిందూస్తాన్ సమచార్ / Santhosha Laxmi