అమరావతి, 24 సెప్టెంబర్ (హి.స.)

ఒక రాష్ట్ర మూలమలుపు కేవలం భౌతిక భవనాలు, మౌలిక సదుపాయాల నిర్మాణంతోనే సాధ్యపడదు; భవిష్యత్ సాంకేతికతలను అందిపుధ్యడంలో చూపే శ్రద్ధపైనే ఆధారపడి ఉంటుంది. ప్రస్తుతం ఆంధ్రప్రదేశ్ చేపడుతున్న డీప్‌టెక్, క్వాంటమ్ కంప్యూటింగ్, ఆర్టిఫిషియల్ ఇంటెలిజెన్స్ (AI) ఆధారిత నూతన ఆవిష్కరణలు రాష్ట్ర సమగ్ర వికాసానికి, ఆర్థిక పురోగతికి సరికొత్త దిక్సూచిగా నిలుస్తున్నాయి. స్వర్ణాంధ్ర@2047 విజన్‌లో భాగంగా అమరావతిని గ్లోబల్ టెక్నాలజీ హబ్‌గా, ప్రత్యేకించి అమరావతి క్వాంటమ్ వ్యాలీగా తీర్చిదిద్దే సంకల్పం ప్రశంసనీయం. ఈ బృహత్తర లక్ష్య సాధన కోసం రాష్ట్ర ప్రభుత్వం కేటాయిస్తున్న నిధులు, వ్యూహాత్మక సంఖ్యాపరమైన ప్రణాళికలు నవ్యాంధ్ర భవితను పూర్తిగా మార్చబోతున్నాయి.

ఆర్థిక కేటాయింపులు – పెట్టుబడుల ప్రణాళిక:

రాష్ట్ర ప్రభుత్వం నిర్దేశించుకున్న దీర్ఘకాలిక ఆర్థిక ప్రణాళికలో సాంకేతిక విప్లవానికి పెద్దపీట వేయడం జరిగింది. జీఎస్‌డీపీ (GSDP) వృద్ధిరేటును ఏటా 15 శాతానికి చేర్చి, 2047 నాటికి 2.4 ట్రిలియన్ డాలర్ల ఆర్థిక వ్యవస్థగా అవతరించాలనే స్వర్ణాంధ్ర@2047 లక్ష్యానికి అనుగుణంగా బడ్జెట్ కేటాయింపులు జరుగుతున్నాయి. ఇందులో భాగంగా కేవలం అమరావతిలో అత్యాధునిక సాంకేతికతలను ప్రోత్సహించడానికి, అమరావతి క్వాంటమ్ సెంటర్ మరియు డీప్‌టెక్ మిషన్ల కోసం సుమారు రూ. 4,000 కోట్ల వ్యయంతో కూడిన ప్రత్యేక వ్యూహాత్మక ప్రాజెక్టులకు రాష్ట్ర కేబినెట్ ఆమోదం తెలిపింది. మొత్తం బడ్జెట్‌లో మూలధన వ్యయం (Capital Outlay) కింద సుమారు రూ. 48,698 కోట్లు కేటాయించడం ద్వారా మౌలిక సాంకేతిక సదుపాయాలకు, డిజిటల్ కారిడార్లకు నిధుల కొరత లేకుండా ప్రభుత్వం చర్యలు తీసుకుంటోంది.

సాంకేతిక పరిజ్ఞానం ఎంత వేగంగా విస్తరిస్తున్నప్పటికీ, సమాజంలో అత్యంత దిగువన ఉన్న పౌరుడికి దాని ఫలాలు అందినప్పుడే ఆ ప్రగతికి సార్థకత చేకూరుతుంది. ఏపీలో రూపుదిద్దుకుంటున్న డిజిటల్ నెట్‌వర్క్ కేవలం పరిశ్రమలకే పరిమితం కాకుండా, AI ఆధారిత సుపరిపాలన (AI Governance) ద్వారా ప్రభుత్వ సేవలను పారదర్శకంగా ఇంటింటికీ చేరవేసే మార్గాన్ని సుగమం చేస్తోంది. నగరాలతో పాటు గ్రామీణ ప్రాంతాల యువతకు అత్యాధునిక సాంకేతిక నైపుణ్యాలలో శిక్షణ ఇవ్వడం, స్థానికంగానే ఉన్నత స్థాయి ఉద్యోగాలు కల్పించడం సామాజిక సమానత్వానికి, ఆర్థిక స్వావలంబనకు దారితీస్తున్నాయి. రాష్ట్రంలోని యువతకు గ్లోబల్ లెవెల్ స్కిల్లింగ్ అందించడానికి ప్రత్యేకంగా వేల కోట్ల రూపాయలతో నైపుణ్యాభివృద్ధి కార్యక్రమాలను అమలు చేస్తున్నారు.

అయితే, ఆధునిక సాంకేతిక ప్రగతి పర్యావరణానికి ముప్పుగా మారకూడదు. ఈ కోణంలో చూస్తే, భారీ డేటా సెంటర్లు, టెక్నాలజీ పార్కుల నిర్వహణకు 'గ్రీన్ ఎనర్జీ' (పునరుత్పాదక ఇంధనం) ను ఉపయోగించే వ్యూహం అభినందనీయం. కార్బన్ ఉద్గారాలను తగ్గిస్తూ, పర్యావరణ సమతుల్యతను కాపాడుతూ సాగే ఈ 'హరిత సాంకేతికత' రాబోయే తరాలకు ఆరోగ్యకరమైన భవిష్యత్తును అందిస్తుంది. ఇంధన శాఖ మరియు పర్యావరణ రక్షణ రంగాలకు బడ్జెట్‌లో పదుల వేల కోట్ల కేటాయింపులు చేయడం ద్వారా హరిత హైడ్రోజన్ మరియు సోలార్ పార్కుల అభివృద్ధికి ప్రభుత్వం ప్రాధాన్యత ఇస్తోంది. సుస్థిరమైన అభివృద్ధికి, పర్యావరణ పరిరక్షణకు ఏపీ చూపిస్తున్న ఈ ప్రాధాన్యత మిగతా రాష్ట్రాలకు సైతం మార్గదర్శకంగా మారుతుంది.

దీంతో పాటు, డిజిటల్ యుగంలో ప్రధాన సవాలుగా మారిన సైబర్ భద్రతను అధిగమించడానికి క్వాంటమ్ ఎన్‌క్రిప్షన్ వంటి వ్యూహాత్మక సాంకేతికతలను ముందే స్వీకరించడం రాష్ట్ర దార్శనికతకు అద్దం పడుతోంది. ఆర్థిక, పాలనా సంబంధిత డేటాకు నిరంతర రక్షణ కల్పించడం వల్ల పెట్టుబడిదారులలో నమ్మకం పెరిగి, అంతర్జాతీయ పెట్టుబడులు వెల్లువెత్తే అవకాశం ఉంది. కేవలం సైబర్ భద్రత మరియు ఎనర్జీ ఇనిషియేటివ్‌ల కోసం ప్రత్యేకంగా తొలి దశలోనే రూ. 36 కోట్ల బడ్జెట్‌తో ప్రాజెక్టులు ప్రారంభించబడ్డాయి.

ఏదేమైనప్పటికీ, సంకల్పాలు కాగితాలకే పరిమితం కాకుండా, ప్రణాళికాబద్ధమైన అమలు, నిరంతర పర్యవేక్షణ ఉన్నప్పుడే అనుకున్న లక్ష്യాలు నెరవేరుతాయి. పాలకులు, నిపుణులు, విద్యా సంస్థలు సమన్వయంతో ముందడుగు వేస్తే, ఆంధ్రప్రదేశ్ దక్షిణ భారతదేశంలోనే కాక, ప్రపంచ స్థాయి డీప్‌టెక్ వేదికగా రూపాంతరం చెందడంలో ఎలాంటి సందేహం లేదు. సాంకేతికత, పర్యావరణం, సామాజిక శ్రేయస్సుల సమ్మేళనమే నవ్యాంధ్ర వికాసానికి అసలైన పునాది.

---------------

హిందూస్తాన్ సమచార్ / Santhosha Laxmi