అమరావతి , 25 సెప్టెంబర్ (హి.స.) ఆంధ్రప్రదేశ్లో స్థానిక సంస్థల ఎన్నికలకు సంబంధించిన ఓటర్ల జాబితా అంశంపై హైకోర్టులో కీలక పరిణామం చోటుచేసుకుంది. స్థానిక సంస్థల ఎన్నికలను ప్రత్యేక సమగ్ర ఓటర్ల జాబితా సవరణ ప్రక్రియ పూర్తయ్యి తుది ఓటర్ల జాబితా ప్రచురించిన తర్వాతే నిర్వహించాలని కోరుతూ వైఎస్సార్ కాంగ్రెస్ పార్టీ దాఖలు చేసిన పిటిషన్పై హైకోర్టు విచారణ జరిపి తీర్పును రిజర్వ్ చేసింది. చీఫ్ జస్టిస్ లిసా గిల్, జస్టిస్ చల్లా గుణరంజన్లతో కూడిన ధర్మాసనం పిటిషన్పై ఇరుపక్షాల వాదనలు విన్న తర్వాత తీర్పును రిజర్వ్ చేసినట్లు నివేదిక పేర్కొంది.

పిటిషన్లో స్థానిక ఎన్నికలకు ఉపయోగించే ఓటర్ల జాబితా విషయంలో అభ్యంతరాలు వ్యక్తం చేశారు. వైఎస్సార్సీపీ తరఫు న్యాయవాది ఎన్నికలను వాయిదా వేయాలని తమ ప్రధాన డిమాండ్ కాదని, తుది ఓటర్ల జాబితా ఆధారంగానే ఎన్నికలు నిర్వహించాలని కోరుతున్నామని వాదించారు. ప్రస్తుత జాబితాలను ఉపయోగిస్తే అర్హులైన ఓటర్లలో కొందరు జాబితా నుంచి తప్పిపోయే అవకాశం ఉందని వాదించారు.

మరోవైపు రాష్ట్ర ఎన్నికల సంఘం తరఫున జనవరి 1, 2026 నాటికి అందుబాటులో ఉన్న ఓటర్ల జాబితాను ఆధారంగా చేసుకుని ఎన్నికలు నిర్వహించే ప్రతిపాదన ఉందని కోర్టుకు తెలియజేశారు.

---------------

హిందూస్తాన్ సమచార్ / పుట్టా సుమన్