అమరావతి , 27 సెప్టెంబర్ (హి.స.)రాష్ట్రంలో 33 రోజులుగా కొత్త కరోనా కేసులు నమోదు కాలేదని మంత్రి సత్యకుమార్ వెల్లడించారు. ఆగస్టు 25 నుంచి సెప్టెంబర్ 26 వరకు పరీక్షలు నిర్వహించినప్పటికీ కొత్త కేసులు బయటపడలేదని ఆయన తెలిపారు. అయితే రాష్ట్రంలో ఇప్పటికే గుర్తించిన కొంతమంది బాధితులకు చికిత్స కొనసాగుతున్నట్లు వైద్యశాఖ వివరించింది.

విశాఖపట్నంలో 18, తూర్పుగోదావరిలో 12, కడపలో 8, ఎన్టీఆర్ జిల్లాలో 3, బాపట్లలో 3 కేసులు ఉండగా, అల్లూరి సీతారామరాజు, అనకాపల్లి, అనంతపురం జిల్లాల్లో రెండేసి కేసులు ఉన్నట్లు పేర్కొన్నారు.

కొత్త కేసులు నమోదుకాకపోవడం రాష్ట్రంలో వైరస్ వ్యాప్తి ప్రస్తుతానికి తక్కువ స్థాయిలో ఉందనే సూచనగా వైద్యశాఖ భావిస్తోంది. అయితే పరీక్షలు, పర్యవేక్షణ కొనసాగించాల్సిన అవసరం ఉందని అధికారులు స్పష్టం చేస్తున్నారు.

ప్రజారోగ్య వ్యవస్థలో వైరల్ వ్యాధుల పర్యవేక్షణ నిరంతర ప్రక్రియగా కొనసాగుతోంది.

ముఖ్యంగా వర్షాకాలం, వరదల సమయంలో నీటి ద్వారా మరియు ఇతర మార్గాల్లో వ్యాధులు వ్యాపించే అవకాశం ఉండటంతో పారిశుధ్యం, తాగునీటి నాణ్యతపై ప్రత్యేక శ్రద్ధ అవసరం.

---------------

హిందూస్తాన్ సమచార్ / పుట్టా సుమన్