హైదరాబాద్ , 15 అక్టోబర్ (హి.స.)తెలంగాణలో ఓటర్ల జాబితాల ప్రత్యేక సమగ్ర సవరణ ప్రక్రియలో భాగంగా విచారణకు హాజరు కావాల్సిన పలువురు ఓటర్లు నిర్ణీత తేదీలకు హాజరుకాలేదు. రాష్ట్ర ప్రధాన ఎన్నికల అధికారి కార్యాలయం నుంచి అందిన గణాంకాల ప్రకారం, 6.70 లక్షలకు పైగా ఓటర్ల విచారణ తేదీలు ముగిసాయి.

ఓటర్ల జాబితాల ప్రత్యేక సమగ్ర సవరణలో వ్యక్తుల వివరాలను పరిశీలించడం, గత జాబితాలతో పోల్చడం, అర్హతలను ధ్రువీకరించడం వంటి చర్యలు చేపడతారు.

నివేదిక ప్రకారం, విచారణ తేదీలు దాటిన ఓటర్ల సంఖ్యలో హైదరాబాద్ జిల్లా ముందంజలో ఉంది. అక్కడ 1,50,260 మంది, రంగారెడ్డి జిల్లాలో 1,02,182 మంది, మేడ్చల్–మల్కాజిగిరి జిల్లాలో 78,301 మంది విచారణ తేదీలకు హాజరుకాలేదని పేర్కొంది.

మళ్లీ నిర్ణయించిన తేదీలకు కూడా కొందరు హాజరుకాలేదని నివేదిక తెలిపింది. హనుమకొండలో 5,092 మంది, నిజామాబాద్లో 2,572 మంది, హైదరాబాద్లో 1,942 మంది, రంగారెడ్డిలో 1,155 మంది, మేడ్చల్–మల్కాజిగిరిలో 1,014 మంది తిరిగి నిర్ణయించిన విచారణ తేదీలకు హాజరుకాలేదని పేర్కొంది.

---------------

హిందూస్తాన్ సమచార్ / పుట్టా సుమన్