న్యూఢిల్లీ:, 22 అక్టోబర్ (హి.స.)

రక్షణ, అంతరిక్షం, అణు ఇంధనం వంటి వ్యూహాత్మక రంగాలలో పోలండ్‌తో సహకారాన్ని మరింత బలోపేతం చేసుకోవడానికి భారత్ అంగీకరించిందని ప్రధాని నరేంద్ర మోదీ గురువారం వెల్లడించారు. ఈ రంగాల్లో సాంకేతిక పరిజ్ఞానం, సామర్థ్యాల ఉమ్మడి అభివృద్ధి, ఉత్పత్తిలో భారత్‌తో భాగస్వాములు కావాలని పోలండ్ కంపెనీలకు ఆయన పిలుపునిచ్చారు.

న్యూఢిల్లీలోని హైదరాబాద్ హౌస్‌లో పోలండ్ ప్రధాని డోనాల్డ్ టస్క్‌తో ప్రధాని మోదీ గురువారం ద్వైపాక్షిక చర్చలు జరిపారు. అనంతరం ఇరు దేశాల నాయకులు సంయుక్త విలేకరుల సమావేశంలో ప్రసంగించి, ఇరు దేశాల మధ్య పరస్పర సహకారానికి సంబంధించిన కీలక అంశాలను వెల్లడించారు.

భారత్, యూరోపియన్ యూనియన్ మధ్య కుదిరిన స్వేచ్ఛా వాణిజ్య ఒప్పందం (FTA) ఆర్థిక సహకారానికి సరికొత్త అవకాశాలను కల్పించిందని ప్రధాని మోదీ పేర్కొన్నారు. 2024లో తాను పోలండ్‌లో పర్యటించిన సమయంలో ఇరు దేశాల బంధం 'వ్యూహాత్మక భాగస్వామ్యం' స్థాయికి చేరిందని గుర్తుచేశారు. ఆ బలమైన పునాదితో గత రెండేళ్లలో భాగస్వామ్యం కొత్త వేగం పుంజుకుందని, భారత్ ఆర్థిక ప్రగతి పోలండ్‌తో సహకార విస్తరణకు నూతన మార్గాలను తెరిచిందని చెప్పారు.

భారత్-పోలండ్ సంబంధాలు కేవలం దౌత్యపరమైన బంధాలకే పరిమితం కాకుండా, మానవత్వం, కరుణ అనే ఉమ్మడి వారసత్వంతో ముడిపడి ఉన్నాయని ప్రధాని పునరుద్ఘాటించారు. రెండవ ప్రపంచ యుద్ధ కాలంలో జామ్‌నగర్, కొల్హాపూర్ రాజకుటుంబాలు వేలాది మంది పోలండ్ పిల్లలు, కుటుంబాలకు భారత్‌లో ఆశ్రయం కల్పించిన చారిత్రక ఘట్టాన్ని గుర్తుచేసుకున్నారు. సంస్కృతి, ప్రజా సంబంధాలే ఇరు దేశాల బంధానికి నిజమైన బలమని చెప్పారు. పోలండ్‌లో సంస్కృత అధ్యయనాలకు సుదీర్ఘ సాంప్రదాయం ఉందని, క్రాకోవ్ నగరంలో భారతీయ అధ్యయనాల కోసం ఒక ప్రత్యేక పీఠాన్ని ఏర్పాటు చేయడం సాంస్కృతిక సంబంధాలను మరింత బలోపేతం చేస్తుందన్నారు.

ప్రజాస్వామ్య విలువలు, చట్టపాలన పట్ల భారత్, పోలండ్ సమాన కట్టుబాటు కలిగి ఉన్నాయని, సమకాలీన సవాళ్లకు అనుగుణంగా గ్లోబల్ గవర్నెన్స్ వ్యవస్థల్లో సంస్కరణలు అవసరమని ఉద్ఘాటించారు. ఉక్రెయిన్, పశ్చిమాసియా పరిస్థితులపై స్పందిస్తూ, శాంతిస్థాపన దిశగా సాగే ప్రతీ అర్ధవంతమైన ప్రయత్నానికి భారత్ నిరంతరం మద్దతు ఇస్తుందని ప్రధాని మోదీ స్పష్టం చేశారు.

---------------

హిందూస్తాన్ సమచార్ / Santhosha Laxmi