న్యూఢిల్లీ, అక్టోబర్ 27 (హిం. స): కేంద్ర జలశక్తి శాఖ మంత్రి సి.ఆర్. పాటిల్ జలవనరులు, నదీ అభివృద్ధి మరియు గంగా పునరుజ్జీవన విభాగానికి చెందిన పలు ప్రాజెక్టులు, పథకాల పురోగతిపై సమీక్ష నిర్వహించారు. ప్రాజెక్టుల పురోగతికి అడ్డంకిగా ఉన్న సమస్యలను గుర్తించి వాటిని తక్షణమే పరిష్కరించాలని, పనులను నిర్దేశిత గడువులోగా పూర్తి చేయాలని అధికారులను ఆదేశించారు. ఈ సమావేశంలో జలశక్తి శాఖ సహాయ మంత్రి రాజ్ భూషణ్ చౌదరి కూడా పాల్గొన్నారు.

సమీక్షా సమావేశంలో శాఖకు చెందిన వివిధ విభాగాలు మరియు సంస్థలు తమ ప్రస్తుత ప్రాజెక్టులు, కార్యకలాపాల వివరాలను వెల్లడించాయని కేంద్ర జలశక్తి మంత్రి తెలిపారు. ఈ సమావేశంలో వరద నిర్వహణ విభాగం, ఫరక్కా బ్యారేజీ ప్రాజెక్ట్, జాతీయ జల మిషన్, ఆయకట్టు ప్రాంత అభివృద్ధి మరియు నీటి నిర్వహణ ఆధునీకరణ (ఎం-క్యాడ్ డబ్ల్యూఎమ్), బేసిన్ నిర్వహణ, జాతీయ జలాభివృద్ధి సంస్థ, కేన్-బెత్వా అనుసంధాన ప్రాజెక్టు అథారిటీ, బ్రహ్మపుత్ర నది సంబంధిత అంశాలు, బ్రహ్మపుత్ర బోర్డు, చిన్ననీటి పారుదల గణాంకాలు, జాతీయ జలవిజ్ఞాన సంస్థ తదితర విభాగాలు పాల్గొన్నాయి.

వరద నిర్వహణ మరియు సరిహద్దు ప్రాంతాల కార్యక్రమం కింద జరుగుతున్న పనుల పురోగతిని ఈ సమావేశంలో సమీక్షించారు. ఫరక్కా బ్యారేజీ గేట్లను మార్చడం, నదీకోతను అరికట్టే చర్యలు మరియు వాటి అమలులో ఎదురవుతున్న సవాళ్లపై కూడా చర్చించారు. జాతీయ జల మిషన్ చేపట్టిన ప్రాథమిక కార్యకలాపాలు, కార్యక్రమాల స్థితిగతులను అడిగి తెలుసుకున్నారు.

ఆయకట్టు ప్రాంత అభివృద్ధి మరియు నీటి నిర్వహణ ఆధునీకరణ కార్యక్రమంలో భాగంగా 35 పైలట్ సమూహాల అమలు తీరును పరిశీలించారు. కేన్-బెత్వా అనుసంధాన ప్రాజెక్టు ప్రస్తుత పరిస్థితితో పాటు అనుసంధాన కాలువ, దౌధన్ ఆకట్ట నిర్మాణ పనులపై చర్చించారు. బ్రహ్మపుత్ర బోర్డు తరఫున ప్రణాళికలు, సమగ్ర ప్రాజెక్టు నివేదిక (డీపీఆర్) రూపకల్పనలో సాధించిన పురోగతిని వివరించారు.

చిన్ననీటి పారుదల గణాంకాల కార్యక్రమం కింద కొనసాగుతున్న నాలుగు సర్వేల పురోగతిని, జాతీయ జలవిజ్ఞాన సంస్థ ప్రధాన కార్యక్రమాల లక్ష్యాలు మరియు సాధించిన విజయాలను సమీక్షించారు.

సమావేశంలో తీసుకున్న నిర్ణయాలను సమర్థవంతంగా అమలు చేయాలని, ప్రాజెక్టులను క్రమం తప్పకుండా పర్యవేక్షించాలని అధికారులను, సంబంధిత సంస్థల అధిపతులను మంత్రి ఆదేశించారు. ప్రాజెక్టులు అనుకున్న సమయానికి పూర్తి కావడానికి రాష్ట్ర ప్రభుత్వాలతో నిరంతరం సమన్వయం పాటించాలని సూచించారు.

హిందూస్తాన్ సమచార్ / Santhosha Laxmi