అమరావతి , 29 అక్టోబర్ (హి.స.)

'ఆర్నాబ్' తుఫాను సృష్టించిన విలయం నుంచి ప్రజలను కాపాడేందుకు, పట్టణాలు మరియు మున్సిపాలిటీలలో సాధారణ జీవనాన్ని పునరుద్ధరించేందుకు ప్రభుత్వం అత్యంత వేగంగా చర్యలు చేపడుతోందని రాష్ట్ర పురపాలక, పట్టణాభివృద్ధి శాఖ మంత్రి పొంగూరు నారాయణ వెల్లడించారు. ఈ ప్రకృతి విపత్తు కారణంగా దెబ్బతిన్న రోడ్లు, డ్రైనేజీ వ్యవస్థలను సరిచేస్తూ, కూలిపోయిన చెట్లు, విద్యుత్ స్తంభాలను తొలగించే ప్రక్రియను మున్సిపల్ అధికారులు రాత్రింబవళ్లు శ్రమిస్తూ పూర్తి చేస్తున్నారని ఆయన తెలిపారు.

మున్సిపల్ అధికారులతో నిర్వహించిన అత్యవసర సమీక్షలో మాట్లాడిన మంత్రి, లోతట్టు ప్రాంతాల్లో నిలిచిపోయిన వరద నీటిని హెవీ మోటార్ల ద్వారా యుద్ధప్రాతిపదికన బయటకు తోడేస్తున్నామని స్పష్టం చేశారు. అంటువ్యాధులు వ్యాపించకుండా ఉండేందుకు పట్టణాల వ్యాప్తంగా పారిశుధ్య పనులను తీవ్రతరం చేశామని, క్రిమిసంహారక మందుల పిచికారీ మరియు ఫాగింగ్ క్రమం తప్పకుండా జరుపుతున్నామని చెప్పారు. మంచినీటి సరఫరాకు ఎక్కడా ఇబ్బంది కలగకుండా ట్యాంకర్ల ద్వారా ప్రత్యామ్నాయ ఏర్పాట్లు చేశామని వివరించారు.

బాధితుల కోసం ఏర్పాటు చేసిన పునరావాస కేంద్రాల్లో ఆహారం, తాగునీరు మరియు అత్యవసర వైద్య సదుపాయాలు నిరంతరం అందుబాటులో ఉండేలా చర్యలు తీసుకున్నామని మంత్రి వివరించారు. బాధితులందరినీ ఆదుకుని, ప్రతి పట్టణంలోనూ పూర్వ స్థితి నెలకొనే వరకు మున్సిపల్ యంత్రాంగం క్షేత్రస్థాయిలోనే అందుబాటులో ఉంటుందని ఆయన హామీ ఇచ్చారు.

---------------

హిందూస్తాన్ సమచార్ / పుట్టా సుమన్