బనాస్కాంత, 30 అక్టోబర్ (హి.స.)

గుజరాత్ పర్యటనలో భాగంగా బనాస్కాంత జిల్లాలోని భిల్డీ వద్ద నిర్వహించిన భారీ బహిరంగ సభలో ప్రధానమంత్రి నరేంద్ర మోదీ పాల్గొని రూ. 14,000 కోట్లకు పైగా విలువైన పలు అభివృద్ధి ప్రాజెక్టులకు శంకుస్థాపనలు మరియు ప్రారంభోత్సవాలు చేశారు. ఈ సందర్భంగా ఏర్పాటు చేసిన సభలో ప్రధాని ఉద్వేగభరితంగా ప్రసంగిస్తూ, తన జీవితం మరియు ప్రతి క్షణం దేశ ప్రజల క్షేమానికి, సంక్షేమానికి మాత్రమే అంకితమని స్పష్టం చేశారు.

నా ఆఖరి శ్వాస వరకు ప్రజాసేవే నా ధ్యేయం:

సభను ఉద్దేశించి ప్రధాని మాట్లాడుతుంది, నా ప్రాణం ఉన్నంతవరకు, నా ఆఖరి శ్వాస వరకు భారత దేశ ప్రజల సేవ చేస్తూనే ఉంటాను. 140 కోట్ల భారతీయుల ప్రయోజనాలే నా మొదటి ప్రాధాన్యం. దేశాన్ని అభివృద్ధి పథంలో ముందుకు తీసుకెళ్లడమే నా ఏకైక లక్ష్యం అని పేర్కొన్నారు. ప్రజాసేవలో ఎదురయ్యే ఎలాంటి సవాళ్లనైనా స్వీకరించడానికి తాను ఎప్పుడూ సిద్ధంగా ఉంటానని చెప్పారు.

కష్టాల్లో కొందరు సంతోషిస్తున్నారు – విపక్షాలపై విమర్శలు:

దేశం ఎదుర్కొంటున్న సవాళ్లు, కష్ట సమయాల్లో కొందరు రాజకీయ ప్రయోజనాల కోసం సంతోషపడటం పట్ల ప్రధాని ఆవేదన వ్యక్తం చేశారు. దేశం ఏవైనా ప్రతికూల పరిస్థితులను లేదా కష్టాలను ఎదుర్కొంటున్నప్పుడు, దానిని చూసి దేశంలోని కొందరు రాజకీయ నాయకులు, శక్తులు సంతోషిస్తున్నాయి. దేశ ప్రయోజనాల కంటే వారి స్వార్థ రాజకీయ ప్రయోజనాలే వారికి ముఖ్యంగా మారాయి. ఇది అత్యంత విచారకరం. ప్రతికూల రాజకీయాలు చేసేవారు దేశ ప్రగతికి ప్రతిబంధకంగా మారుతున్నారు అని విపక్షాల వైఖరిపై తీవ్రస్థాయిలో మండిపడ్డారు.

వ్యవసాయం, పశుసంవర్ధక రంగానికి బహుమతి:

ఈ పర్యటనలో భాగంగా బనాస్కాంతలో రూ. 325 కోట్ల వ్యయంతో 127 ఎకరాల విస్తీర్ణంలో నిర్మించిన అత్యధునిక 'భారత్ బోవైన్ బ్రీడింగ్ అండ్ రీసెర్చ్ సెంటర్'ను ప్రధాని ప్రారంభించారు. దేశంలో పశుగ్రాస విప్లవం, పాల ఉత్పత్తి పెంపు మరియు పశువుల సంకరజాతి అభివృద్ధి కోసం ఈ పరిశోధనా కేంద్రం ఎంతో ఉపయోగపడుతుందని తెలిపారు. రైతు సోదరుల ఆదాయాన్ని రెట్టింపు చేయడమే తమ ప్రభుత్వ ప్రధాన ఉద్దేశమని ఉద్ఘాటించారు.

పిఎమ్-కిసాన్ నిధుల విడుదల:

సభ వేదికగా దేశవ్యాప్తంగా ఉన్న అర్హులైన రైతులకు పిఎమ్-కిసాన్ (PM-KISAN) పథకం కింద 24వ విడత నిధులను ప్రధాని మోదీ విడుదల చేశారు. అలాగే అగ్రికల్చర్ ఇన్ఫ్రాస్ట్రక్చర్ ఫండ్ (AIF) ద్వారా రూ. 4,950 కోట్ల వ్యయంతో పూర్తయిన 521 ప్రాజెక్టులను (కోల్డ్ స్టోరేజీలు, ప్రొసెసింగ్ యూనిట్లు) జాతికి అంకితం చేశారు. రవాణా వ్యవస్థను మెరుగుపరచడానికి అహ్మదాబాద్ మెట్రో ఫేజ్-2 పనులతో పాటు కొత్త రైలు సేవలను జెండా ఊపి ప్రారంభించారు.

అక్టోబర్ 31న జరగబోయే సర్దార్ వల్లభ్‌భాయ్ పటేల్ జయంతి (రాష్ట్రీయ ఏకతా దివస్) సందర్భంగా ఏక్తా నగర్ (కెవాడియా)లోని 'స్టాచ్యూ ఆఫ్ యూనిటీ' వద్ద నివాళులర్పించనున్నట్లు ప్రధాని తెలిపారు. దేశ ఐక్యత, సమగ్రతల కోసం ప్రతి ఒక్కరూ కృషి చేయాలని ఈ సందర్భంగా ప్రధాని పిలుపునిచ్చారు.

---------------

హిందూస్తాన్ సమచార్ / Santhosha Laxmi