అమరావతి , 06 అక్టోబర్ (హి.స.)ఆంధ్రప్రదేశ్లో స్థానిక సంస్థల ఎన్నికల నిర్వహణపై కొనసాగుతున్న న్యాయపరమైన వివాదంలో సుప్రీంకోర్టు కీలక పరిణామం చోటుచేసుకుంది. స్థానిక సంస్థల ఎన్నికలను ఓటర్ల జాబితా ప్రత్యేక సమగ్ర సవరణ పూర్తయ్యే వరకు వాయిదా వేయాలన్న అభ్యర్థనపై సుప్రీంకోర్టు తక్షణ మధ్యంతర ఉపశమనం ఇవ్వలేదు. అయితే ఈ అంశంపై దాఖలైన పిటిషన్ను అక్టోబర్ 9న విచారించేందుకు అంగీకరించింది.

వైఎస్సార్సీపీ తరఫున దాఖలైన పిటిషన్లో ఓటర్ల జాబితా ప్రత్యేక సమగ్ర సవరణ పూర్తయ్యే వరకు స్థానిక సంస్థల ఎన్నికలు నిర్వహించరాదని కోరినట్లు సమాచారం. ఎన్నికల ప్రక్రియకు సంబంధించి రాష్ట్ర ఎన్నికల సంఘం ఎప్పుడైనా నోటిఫికేషన్ జారీ చేసే అవకాశం ఉందని, అందువల్ల అత్యవసరంగా జోక్యం చేసుకోవాలని పిటిషనర్ తరఫు న్యాయవాదులు సుప్రీంకోర్టును కోరారు.

అయితే సుప్రీంకోర్టు వెంటనే ఎన్నికల ప్రక్రియను నిలిపివేసే మధ్యంతర ఆదేశాలు ఇవ్వలేదు.

పరిపాలనా సరిహద్దులపై ఉన్న కొన్ని పరిమితులు వార్డులకు వర్తించవని, ప్రస్తుత ఓటర్ల జాబితాలతో స్థానిక సంస్థల ఎన్నికలు నిర్వహించడంపై తక్షణ నిషేధం లేదనే అంశాన్ని బెంచ్ పరిశీలించింది.

అక్టోబర్ 9 విచారణలో కోర్టు మరింత స్పష్టమైన ఆదేశాలు ఇచ్చే అవకాశం ఉంది. అప్పటి వరకు స్థానిక ఎన్నికల ప్రక్రియపై రాజకీయ పార్టీల దృష్టి కొనసాగనుంది. రాష్ట్రంలో గ్రామపంచాయతీలు, మండల పరిషత్లు, జిల్లా పరిషత్లు, పట్టణ స్థానిక సంస్థలకు ఎన్నికలు ఎప్పుడు జరుగుతాయన్నది రాజకీయంగా కూడా అత్యంత ప్రాధాన్యం కలిగిన అంశం. ఓటర్ల జాబితా సవరణ, రిజర్వేషన్లు, ఎన్నికల షెడ్యూల్ వంటి అంశాలు పరస్పరం అనుసంధానమై ఉండటంతో తదుపరి సుప్రీంకోర్టు విచారణపై ఆసక్తి పెరిగింది.

---------------

హిందూస్తాన్ సమచార్ / పుట్టా సుమన్