
గువాహటి, 18 నవంబర్ (హి.స.)
రాబోయే రోజుల్లో అసోం రాష్ట్రం హిందుత్వకు అత్యంత బలమైన కోటగా ఎదుగుతుందని విశ్వహిందూ పరిషత్ (వీహెచ్పీ) జాతీయ అధ్యక్షుడు అలోక్ కుమార్ ధీమా వ్యక్తం చేశారు. తమ సంప్రదాయాలను కాపాడుకోవడానికి, హిందూ సమాజాన్ని బలోపేతం చేయడానికి అక్కడి ధార్మిక, స్థానిక గిరిజన తెగలు చేస్తున్న కృషి అభినందనీయమని ఆయన పేర్కొన్నారు. బుధవారం గువాహటిలోని వీహెచ్పీ ప్రధాన కార్యాలయం పాంచజన్య భవన్లో ఏర్పాటు చేసిన విలేకరుల సమావేశంలో ఆయన మాట్లాడుతూ, అసోం ప్రభుత్వం ఉమ్మడి పౌర స్మృతి (యూసీసీ) అమలు దిశగా తీసుకుంటున్న చర్యలను మనస్ఫూర్తిగా స్వాగతిస్తున్నట్లు తెలిపారు. రాజ్యాంగంలోని ఆర్టికల్ 14 ప్రకారం స్త్రీ, పురుష సమానత్వాన్ని కాపాడటానికి, వ్యక్తిగత చట్టాల్లో ఉన్న వివక్షను తొలగించడానికి యూసీసీ ఎంతో అవసరమని ఆయన అభిప్రాయపడ్డారు.
వారాల క్రితం తాను అసోంలో పర్యటించి సాధువులు, మత పెద్దల ఆశీస్సులు తీసుకున్నట్లు అలోక్ కుమార్ వివరించారు. మహాపురుష్ శ్రీమంత శంకరదేవ, మాధవదేవ, నారాయణదేవలకు సంబంధించిన పలు సత్రాలను సందర్శించినట్లు తెలిపారు. భగవద్గీత స్ఫూర్తితో కూడిన జీవన విధానాన్ని, కృష్ణ భక్తిని, హిందూ చైతన్యాన్ని పెంపొందించడంలో ఈ ఆధ్యాత్మిక కేంద్రాలు కీలక పాత్ర పోషిస్తున్నాయని కొనియాడారు. అలాగే బోడో సమాజం నిర్వహించిన బ్రహ్మ ధర్మ యజ్ఞంలో, కార్బి తెగకు చెందిన లఖోమోన్ ధర్మ ఆధ్యాత్మిక కేంద్రంలో పాల్గొన్నట్లు చెప్పారు. విభిన్న హిందూ సంప్రదాయాలు, స్థానిక గిరిజన ఆచారాలు కలిసికట్టుగా సమాజాన్ని మరింత శక్తివంతం చేస్తాయని ఆయన ఆశాభావం వ్యక్తం చేశారు.
ప్రలోభాలు, బెదిరింపుల ద్వారా జరిగే మతమార్పిడులను అరికట్టడానికి కఠిన చర్యలు తీసుకోవాలని అలోక్ కుమార్ పిలుపునిచ్చారు. స్వస్థత ప్రార్థనల పేరుతో జరిగే సమావేశాలపై అసోం ప్రభుత్వం విధించిన ఆంక్షలను ఆయన సమర్థించారు. టూరిస్ట్ వీసాలపై భారత్కు వచ్చే విదేశీయులు గ్రామాల్లో మత ప్రచారం చేయడం వీసా నిబంధనలకు విరుద్ధమని, దీనిని అడ్డుకోవడానికి తక్షణమే ప్రత్యేక చట్టం తీసుకురావాలని కోరారు. గత తరాల్లో హిందూ లేదా స్థానిక ధర్మాలను వీడిన వారిని తిరిగి తమ పూర్వీకుల సంప్రదాయాల్లోకి తీసుకురావడానికి వీహెచ్పీ కృషి చేస్తోందన్నారు. గోసంరక్షణ విషయంలో అసోం చట్టాలను ప్రశంసిస్తూనే, పాలివ్వడం ఆగిపోయిన తర్వాత కూడా పశువులు ఆర్థికంగా ఉపయోగపడేలా గోమూత్రం, పేడ ఉత్పత్తులను ప్రోత్సహించాలని ఆయన సూచించారు.
---------------
హిందూస్తాన్ సమచార్ / Santhosha Laxmi