ఢిల్లీ , 06 నవంబర్ (హి.స.)

అస్సాంలోని డిబ్రూగఢ్ జిల్లా తెంగాఖత్ ప్రాంతంలో ఉన్న 'ఆయిల్ ఇండియా లిమిటెడ్' (OIL) కేంద్ర ట్యాంక్ ఫామ్ ప్రాంగణంలో ఘోర ప్రమాదం సంభవించింది. సాంకేతిక నిర్వహణ పనులు చేపడుతున్న సమయంలో ఓ భారీ క్రూడ్ ఆయిల్ స్టోరేజ్ ట్యాంక్ ఉన్నట్టుండి పేలిపోవడంతో ఒక్కసారిగా మంటలు చెలరేగాయి. ఈ దురదృష్టకర సంఘటనలో ప్రాంగణంలో పనిచేస్తున్న నలుగురు సిబ్బంది తీవ్రంగా గాయపడగా, వారిని వెంటనే సమీపంలోని ఆసుపత్రికి తరలించారు.

ఘటన సమాచారం అందగానే అగ్నిమాపక యంత్రాలు మరియు నేషనల్ డిజాస్టర్ రెస్పాన్స్ ఫోర్స్ (NDRF) బృందాలు ఘటనా స్థలానికి చేరుకున్నాయి. సుమారు 10కి పైగా అగ్నిమాపక వాహనాలు గంటల పాటు శ్రమించి మంటలను అదుపులోకి తీసుకొచ్చాయి. నిమిషాల వ్యవధిలోనే పొగలు ఆకాశాన్ని ముంచెత్తడంతో చుట్టుపక్కల నివసిస్తున్న ప్రజలు తీవ్ర భయాందోళనలకు గురయ్యారు. ప్రమాద తీవ్రత దృష్ట్యా ముందస్తు జాగ్రత్తగా చుట్టుపక్కల ప్రాంతాల నుండి ప్రజలను సురక్షిత ప్రాంతాలకు ఖాళీ చేయించారు.

ఈ ప్రమాదానికి గల ప్రాథమిక కారణాలపై ఆయిల్ ఇండియా యాజమాన్యం మరియు ప్రభుత్వ అధికారులు ఉన్నత స్థాయి విచారణకు ఆదేశించారు. వెల్డింగ్ పనులు జరుగుతున్న సమయంలో అకస్మాత్తుగా వెలువడిన గ్యాస్ లీకేజీ వల్ల ఇంధన వాయువులు మండి పేలుడు సంభవించి ఉండవచ్చని అధికారులు అనుమానిస్తున్నారు. జిల్లా యంత్రాంగం సంఘటనా స్థలాన్ని సందర్శించి సహాయక చర్యలను పర్యవేక్షించింది. ప్రమాదం వల్ల జరిగిన ఆస్తి నష్టం అంచనా వేస్తున్నామని, భవిష్యత్తులో ఇటువంటి సంఘటనలు పునరావృతం కాకుండా ప్లాంట్లో భద్రతా ప్రమాణాలను సమీక్షిస్తున్నామని కంపెనీ ప్రతినిధులు స్పష్టం చేశారు.

---------------

హిందూస్తాన్ సమచార్ / పుట్టా సుమన్