ఢిల్లీ , 08 నవంబర్ (హి.స.)

అమెరికా ఆంక్షలు కొనసాగుతున్న వేళ హార్ముజ్ జలసంధి ప్రాంతంలో పరిస్థితి ఒక్కసారిగా వేడెక్కింది. దక్షిణ ఇరాన్ లో పలుచోట్ల పెద్ద శబ్దాలతో పేలుళ్లు జరగడం, అదే జలమార్గంలో రెండు చమురు నౌకలు మంటల్లో చిక్కుకోవడం కలకలం రేపింది. దీంతో వాషింగ్టన్, టెహ్రాన్ మధ్య ఇప్పటికే ఉన్న గొడవ మరింత ముదిరేలా కనిపిస్తోంది. పరిస్థితి ఇలాగే ఉంటే అమెరికా మళ్లీ సైనిక చర్యకు దిగుతుందేమోనన్న భయం కూడా పెరుగుతోంది.

శనివారం సాయంత్రం వేళ ఖేష్మ్ ద్వీపంతో సహా దక్షిణ ఇరాన్ లోని కొన్ని ప్రాంతాల్లో పేలుడు శబ్దాలు వినిపించాయి. ఇదే టైంలో ఆ జలసంధిలో వెళ్తున్న రెండు ట్యాంకర్లు సముద్రంలో వేసిన మైన్లను తాకి అంటుకున్నాయని ఇరాన్ వర్గాలు చెబుతున్నాయి. రివల్యూషనరీ గార్డ్స్ నేవీ కూడా ఇదే విషయాన్ని చెప్పింది. ఇరాన్ నౌకలపై అమెరికా పెట్టిన దిగ్బంధం నేపథ్యంలో రెండు దేశాల మధ్య మాట మరింత పెరుగుతోంది. అమెరికాలో మధ్యంతర ఎన్నికలు ముగిసిన తర్వాత ఇరాన్ పై మళ్లీ దాడి జరిగే అవకాశం ఉందన్న మాట కూడా బలంగా వినిపిస్తోంది.

దక్షిణాది ప్రాంతాల్లో పేలుళ్ల శబ్దాలు వినిపించాయని ఇరాన్ ప్రభుత్వ టీవీ చెప్పినా, అవి క్షిపణి దాడులేనని అధికారులు ఇంకా తేల్చలేదు. ఖేష్మ్ ద్వీపంలో వినిపించిన పేలుళ్లకు క్షిపణులతో సంబంధం లేదని తస్నిమ్ వార్తా సంస్థ ఓ వర్గాన్ని చూపుతూ రాసింది. కానీ అంతకుముందే ఆ ద్వీపంపై రెండు క్షిపణులు పడ్డాయని కూడా అదే సంస్థ పేర్కొనడం గమనార్హం. అయితే ఆ దాడుల్లో ఎంత నష్టం జరిగిందో మాత్రం ఎవరూ చెప్పలేదు.

ఇక ఆదివారం తెల్లవారుజామున రివల్యూషనరీ గార్డ్స్ నేవీ మరో ప్రకటన చేసింది. అనుమతి లేని దారిలో వెళ్లబోయిన రెండు చమురు నౌకలు మైన్లను ఢీకొని కాలిపోయాయని తెలిపింది. దక్షిణ ఇరాన్ లో జరిగిన పేలుళ్లకు, ఈ నౌకల ఘటనకు లింక్ ఉందా అనేది ఇంకా తేలలేదు. తాము పెట్టిన నిబంధనలు పాటించడం లేదంటూ ఇరాన్ ఇంతకుముందు కూడా కొన్ని నౌకలను అడ్డుకుంది. ఈ ముఖ్యమైన సముద్ర దారిపై తన ఆధిపత్యాన్ని చూపించుకుంటూనే అమెరికాపై ఒత్తిడి పెంచాలని టెహ్రాన్ చూస్తోందని విశ్లేషకులు అంటున్నారు.

---------------

హిందూస్తాన్ సమచార్ / సంపత్ రావు, జర్నలిస్ట్..