హైదరాబాద్, 08 నవంబర్ (హి.స.)

జపాన్ మధ్య భాగంలో ఆదివారం తెల్లవారుజామున సంభవించిన భారీ భూకంపం ప్రజలను ఉలిక్కిపడేలా చేసింది.

భూమి ఒక్కసారిగా కదిలిపోవడంతో భవనాల్లో ఉన్న వారంతా భయంతో రోడ్ల మీదకు పరుగులు తీశారు. ఈ ప్రకంపనల వల్ల కనీసం 22 మందికి గాయాలయ్యాయని అక్కడి మీడియా చెబుతోంది. పలు దుకాణాల అద్దాలు పగిలి రోడ్లపై గాజు పెంకులు చెల్లాచెదురుగా పడ్డాయి.

స్థానిక సమయం ప్రకారం రాత్రి దాటాక 1.04 గంటలకు ఈ భూకంపం సంభవించింది. షిజుయోకా ప్రాంతంలో భూమికి దాదాపు 40 కిలోమీటర్ల లోతున దీని కేంద్రం ఉన్నట్లు గుర్తించారు. జపాన్ వాతావరణ సంస్థ దీని తీవ్రతను 5.7గా చెప్పగా, అమెరికా జియోలాజికల్ సర్వే మాత్రం 5.5గా నమోదు చేసింది.

ఐచి, హమామత్సుతో పాటు యమనాషి, గిఫు ప్రాంతాల్లోనూ భూమి కదిలింది. క్యోటో, నారా వంటి పాత నగరాల్లో కూడా దీని ప్రభావం కనిపించింది. అధికారుల లెక్క ప్రకారం ఐచి ప్రాంతంలోనే కదలిక ఎక్కువగా ఉంది. అయితే దూరంలో ఉన్న టోక్యోలో మాత్రం దీని ప్రభావం పెద్దగా తెలియలేదు.

భవనాల నుంచి బయటకు వస్తుండగా మెట్లపై నుంచి జారిపడి చాలా మంది గాయపడ్డారు. మొత్తం 22 మంది గాయపడినట్లు ఇప్పటివరకు సమాచారం అందింది.

ఈ ఘటనతో అధికారులు వెంటనే అప్రమత్తమయ్యారు. ప్రభావిత ప్రాంతాల్లో షింకాన్సెన్ బుల్లెట్ రైళ్లను నెమ్మదిగా నడిపించారు. భూకంపం వల్ల పట్టాలు దెబ్బతినే అవకాశం ఉండటంతో ముందు జాగ్రత్తగా ఈ నిర్ణయం తీసుకున్నారు.

---------------

హిందూస్తాన్ సమచార్ / సంపత్ రావు, జర్నలిస్ట్..