ముంబై, 22 ఫిబ్రవరి (హి.స.)

బాలీవుడ్ ప్రముఖ హాస్యనటుడు రాజ్పాల్ యాదవ్కు సంబంధించి దశాబ్దకాలంగా కొనసాగుతున్న ఆర్థిక వివాదంలో ఢిల్లీ హైకోర్టులో ఊరట లభించింది. వ్యాపారవేత్త మాధవ్ గోపాల్ అగర్వాల్తో ఉన్న కేసులో కోర్టు ఆయనకు మధ్యంతర బెయిల్ మంజూరు చేసింది. అయితే, ఈ వివాదానికి కేవలం డబ్బు మాత్రమే కారణం కాదని, దీని వెనుక బాలీవుడ్ మెగాస్టార్ అమితాబ్ బచ్చన్కు సంబంధించిన ఓ సంఘటన ఉందని రాజ్పాల్ తరపు న్యాయవాది వెల్లడించడం ఇప్పుడు చర్చనీయాంశంగా మారింది.

రాజ్పాల్ యాదవ్ స్వీయ దర్శకత్వంలో నిర్మించిన 'అతా పతా లాపతా' (2012) సినిమా కోసం వ్యాపారవేత్త మాధవ్ గోపాల్ నుంచి రూ.5 కోట్లు అప్పుగా తీసుకున్నారు. ఆ సినిమా మ్యూజిక్ లాంచ్కు అమితాబ్ బచ్చన్ ముఖ్య అతిథిగా హాజరయ్యారు. ఆ సమయంలో బిగ్ బీతో కలిసి వేదిక పంచుకోవాలని మాధవ్ ఆశపడ్డారని, కానీ అందుకు తాము అంగీకరించకపోవడంతో ఆయన ఆగ్రహానికి గురయ్యారని రాజ్పాల్ లాయర్ కోర్టుకు తెలిపారు. ఆ కోపంతోనే ఒప్పందాన్ని ఉల్లంఘించారంటూ అప్పుడే కేసు పెట్టారని వివరించారు.

వాస్తవానికి రూ.5 కోట్ల అప్పు వడ్డీలతో కలిపి రూ.10.40 కోట్లకు చేరగా, రాజ్పాల్ ఇప్పటికే రూ.1.90 కోట్లు చెల్లించారు. మిగిలిన మొత్తానికి బదులుగా రూ.15 కోట్ల విలువైన ఆస్తిని గ్యారెంటీగా ఇచ్చేందుకు ఒకరు ముందుకొచ్చినా, ఫిర్యాదుదారుడు అంగీకరించలేదని న్యాయవాది పేర్కొన్నారు. డబ్బు కంటే రాజ్పాల్కు జైలు శిక్ష పడాలన్నదే వారి ఉద్దేశమని ఆరోపించారు.

గతంలో ఇచ్చిన చెక్కులను బ్యాంకులో వేయడంతో ఈ వివాదం ముదిరి, ట్రయల్ కోర్టు రాజ్పాల్కు మూడు నెలల జైలు శిక్ష విధించింది. దీనిపై అప్పీల్ చేయగా, తాజాగా హైకోర్టు మధ్యంతర బెయిల్ ఇచ్చింది. మధ్యవర్తిత్వం ద్వారా సమస్యను పరిష్కరించుకోవడానికి తాము సిద్ధంగా ఉన్నామని రాజ్పాల్ తరపు బృందం కోర్టుకు విన్నవించింది. కేసు విచారణ కొనసాగుతోంది.

---------------

హిందూస్తాన్ సమచార్ / SANDHYA PRASADA PV