న్యూఢిల్లీ, 17 మార్చి (హి.స.)
పారిశ్రామిక వివాదాల చట్టం, 1947 కింద 'పరిశ్రమ' అనే పదానికి ఉండాల్సిన సరైన నిర్వచనంపై సుప్రీంకోర్టు (Supreme Court) మంగళవారం (మార్చి 17, 2026) కీలక విచారణ ప్రారంభించింది.
48 ఏళ్ల నాటి తీర్పుపై సుప్రీంకోర్టులో పునఃసమీక్ష ప్రారంభం అయింది. ప్రధాన న్యాయమూర్తి జస్టిస్ సూర్యకాంత్ నేతృత్వంలోని తొమ్మిది మంది సభ్యుల రాజ్యాంగ ధర్మాసనం ఈ అంశాన్ని పరిశీలిస్తోంది. 1978లో 'బెంగళూరు వాటర్ సప్లై' కేసులో జస్టిస్ వి.ఆర్. కృష్ణయ్యర్ ఇచ్చిన తీర్పును ఈ ధర్మాసనం పునఃసమీక్షిస్తోంది. నాటి తీర్పు ప్రకారం.. లాభాపేక్ష లేకపోయినా క్రమబద్ధమైన కార్యకలాపాలు సాగించే విద్యాసంస్థలు, ఆసుపత్రులు, స్వచ్చంద సంస్థలను కూడా 'పరిశ్రమలు'గా పరిగణించారు. దీనివల్ల ఆయా సంస్థల్లోని కార్మికులకు లేబర్ చట్టాల రక్షణ లభిస్తుంది.
ప్రస్తుత విచారణలో అటార్నీ జనరల్ ఆర్. వెంకటరమణి తన వాదనలు వినిపిస్తున్నారు. ప్రభుత్వ సంక్షేమ పథకాలు, సామాజిక సేవా కార్యక్రమాలను కూడా 'పారిశ్రామిక కార్యకలాపాలు'గా చూడవచ్చా? అనే అంశంపై ధర్మాసనం ప్రధానంగా దృష్టి సారించింది. అలాగే, నవంబర్ 2025 నుంచి అమలులోకి వచ్చిన 'పారిశ్రామిక సంబంధాల కోడ్, 2020' ఈ నిర్వచనంపై ఎలాంటి ప్రభావం చూపుతుందనేది కూడా కోర్టు తేల్చనుంది. ఈ విచారణ ఫలితం దేశంలోని లక్షలాది మంది కార్మికుల హక్కులను, వేలాది ప్రభుత్వ మరియు ప్రైవేటు సంస్థల నిర్వహణను ప్రభావితం చేయనుంది.
---------------
హిందూస్తాన్ సమచార్ / విడియాల వెంకటేశ్వర్ రావు
