ఢాకా: బాంగ్లాదేశ్, 07 మార్చి (హి.స.)

ఇరాన్ VS అమెరికా, ఇజ్రాయెల్ యుద్ధ ప్రభావం పశ్చిమాసియాపై తీవ్రంగా పడింది. ఈ క్రమంలోనే బంగ్లాదేశ్ రాజధాని ఢాకాలో గత రెండు రోజులుగా ఇంధన కొరత ఏర్పడుతుందనే భయంతో వాహనదారులు పెట్రోల్ బంకుల వద్ద భారీగా బారులు తీరుతున్నారు. పశ్చిమాసియాలో (ముఖ్యంగా ఇరాన్, ఇజ్రాయెల్, అమెరికా) మధ్య నెలకొన్న యుద్ధ ఉద్రిక్తతల కారణంగా అంతర్జాతీయ సరఫరా వ్యవస్థకు అంతరాయం కలుగుతుందనే ఆందోళన ఈ పరిస్థితికి ప్రధాన కారణంగా మారింది. హార్మూజ్ జలసంధి గుండా చమురు రవాణా నిలిచిపోవచ్చనే వార్తలతో ప్రజలు 'పానిక్ బయింగ్' (భయాందోళనతో ముందే కొనుగోలు చేయడం)కు పాల్పడుతున్నారు. దీంతో ఢాకాలోని ప్రధాన రహదారులపై కిలోమీటర్ల మేర వాహనాలు నిలిచిపోయి తీవ్ర ట్రాఫిక్ జామ్ ఏర్పడింది.

ఈ అసాధారణ రద్దీని నియంత్రించడానికి బంగ్లాదేశ్ పెట్రోలియం కార్పొరేషన్ (BPC) మార్చి 6, 2026 నుండి ఇంధన అమ్మకాలపై రేషనింగ్ (పరిమితులు) విధిస్తూ కీలక ఆదేశాలు జారీ చేసింది. దీని ప్రకారం, మోటార్ సైకిళ్లకు రోజుకు గరిష్టంగా 2 లీటర్లు, ప్రైవేట్ కార్లకు 10 లీటర్లు, ఎసయూవీలు, మైక్రోబస్సులకు 20-25 లీటర్ల చొప్పున మాత్రమే పెట్రోల్, ఆక్టేన్ విక్రయించాలని నిర్ణయించారు. అంతేకాకుండా, వాహనదారులు ఇంధనం కొనుగోలు చేసేటప్పుడు తప్పనిసరిగా పాత రసీదును చూపించాలని, కొత్తగా ఇచ్చే రసీదులో ధర, పరిమాణం స్పష్టంగా ఉండాలని ప్రభుత్వం నిబంధనలు పెట్టింది.

ప్రభుత్వం, అధికారులు దేశంలో ఇంధన నిల్వలు సరిపడా ఉన్నాయని, ఎవరూ ఆందోళన చెందాల్సిన అవసరం లేదని భరోసా ఇస్తున్నారు. ప్రస్తుతం బంగ్లాదేశ్ వద్ద సుమారు 14 రోజులకు సరిపడా డీజిల్, 28 రోజులకు సరిపడా ఆక్టేన్ నిల్వలు ఉన్నట్లు సమాచారం. అనవసర ప్రయాణాలను తగ్గించుకోవాలని, విద్యుత్, ఇంధనాన్ని పొదుపుగా వాడుకోవాలని ఇంధన మంత్రిత్వ శాఖ పౌరులను కోరింది. కృత్రిమ కొరత సృష్టించి ఎక్కువ ధరకు విక్రయించే బంకులపై కఠిన చర్యలు తీసుకుంటామని ఈ సందర్భంగా ప్రభుత్వం హెచ్చరించింది.

---------------

హిందూస్తాన్ సమచార్ / సంపత్ రావు, జర్నలిస్ట్..