అమరావతి, 03 జూన్ (హి.స.)

కశింకోట, జాతీయ రహదారిపై మండలంలోని ఎన్జీపాలెం వద్ద మంగళవారం సాయంత్రం రెండు లారీలు ఢీకొన్నాయి. ఈ ప్రమాదంలో లారీ డ్రైవరు క్యాబిన్లో ఇరుక్కుపోయాడు. సీఐ అల్లు స్వామినాయుడు కథనం ప్రకారం.. ఇక్కడ పెట్రోలు బంకు నుంచి రహదారిపైకి వస్తున్న లారీని మరో లారీ ఢీకొట్టింది. ఈ ప్రమాదంలో ఢీకొట్టిన లారీ డ్రైవరు కాలు స్టీరింగ్లో ఇరుక్కుపోయింది. సమాచారం అందిన వెంటనే సీఐ సిబ్బందితో సంఘటనా స్థలానికి చేరుకొని స్థానికుల సాయంతో ఆ డ్రైవరును బయటకు తీయించి 108 వాహనంలో అనకాపల్లి ఆసుపత్రికి తరలించారు. ఆ సమయంలో వాహనాలు రాకపోవడంతో పెను ప్రమాదం తప్పింది. ప్రమాదం కారణంగా జాతీయ రహదారిపై వాహనాల రాకపోకలు నిలిచిపోయాయి. పోలీసులు లారీని పక్కకు తొలగించి వాహనాల రాకపోకలను క్రమబద్ధీకరించారు.

---------------

హిందూస్తాన్ సమచార్ / నిత్తల రాజీవ