న్యూఢిల్లీ, 11 జూలై (హి.స.)

ప్రముఖ క్విక్ కామర్స్ ప్లాట్‌ఫారమ్ 'స్విగ్గీ ఇన్‌స్టామార్ట్' (Swiggy Instamart) చిక్కుల్లో పడింది. ఈ ప్లాట్‌ఫారమ్ ద్వారా డెలివరీ అవుతున్న ఆహార పదార్థాల నాణ్యత, ప్యాకేజింగ్ మరియు ఇతర నిబంధనలపై వినియోగదారుల నుంచి పెద్ద ఎత్తున ఫిర్యాదులు రావడంతో భారత ఆహార భద్రత ప్రమాణాల సంస్థ (FSSAI) కఠిన చర్యలకు ఉపక్రమించింది. 'ఫుడ్ సేఫ్టీ అండ్ స్టాండర్డ్స్ యాక్ట్ 2006' (FSS Act 2006) కింద ఉన్న నిబంధనలను ఉల్లంఘించినట్లు వచ్చిన ఆరోపణలపై స్విగ్గీ ఇన్‌స్టామార్ట్‌కు ఎఫ్‌ఎస్‌ఎస్‌ఏఐ మొత్తం 9 షోకాజ్ నోటీసులను జారీ చేసింది.

ఈ నోటీసులపై స్పందిస్తూ, వినియోగదారుల ఫిర్యాదులపై పూర్తి స్థాయి వివరణతో కూడిన నివేదికను (Compliance Report) తక్షణమే సమర్పించాలని ఎఫ్‌ఎస్‌ఎస్‌ఏఐ సదరు ఫుడ్ బిజినెస్ ఆపరేటర్ (FBO) అయిన స్విగ్గీని ఆదేశించింది. నిర్దేశిత గడువులోగా సరైన వివరణ ఇవ్వని పక్షంలో, సంస్థపై చట్టపరమైన కఠిన చర్యలు (Legal Action) ప్రారంభించాల్సి ఉంటుందని అధికారులు హెచ్చరించారు. ఆన్‌లైన్ ఫుడ్ మరియు కిరాణా డెలివరీ యాప్‌లలో కస్టమర్ల భద్రత, ఆహార నాణ్యతా ప్రమాణాల అమలును పర్యవేక్షించేందుకు ఈ చర్యలు చేపట్టినట్లు తెలుస్తోంది.

---------------

హిందూస్తాన్ సమచార్ / Santhosha Laxmi