హైదరాబాద్ , 24 సెప్టెంబర్ (హి.స.)యాదాద్రి థర్మల్ పవర్ ప్లాంట్ లో విద్యుత్ ఉత్పత్తి నిలిచిపోవడానికి బొగ్గు కొరత కారణమవుతున్న నేపథ్యంలో, దసరా పండుగకు ముందే ప్లాంట్ను పూర్తి స్థాయి సామర్థ్యంతో నడిపించాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు.

విద్యుత్ శాఖపై నిర్వహించిన ఉన్నతస్థాయి సమీక్షలో ముఖ్యమంత్రి, ఉప ముఖ్యమంత్రి మల్లు భట్టి విక్రమార్కతో కలిసి పరిస్థితిని సమీక్షించారు. రాష్ట్రంలో విద్యుత్ డిమాండ్, థర్మల్ ప్లాంట్ల పనితీరు, వ్యవసాయానికి అవసరమైన విద్యుత్, లిఫ్ట్ ఇరిగేషన్ మోటార్ల నిర్వహణ వంటి అంశాలపై సమావేశంలో చర్చ జరిగింది. యాదాద్రి ప్లాంట్కు G-9 గ్రేడ్ బొగ్గు అవసరమని అధికారులు ముఖ్యమంత్రికి వివరించారు. ప్రస్తుతం సింగరేణి నుంచి ఆ నాణ్యత కలిగిన బొగ్గును అందించే పరిస్థితి లేదని, సమీప భవిష్యత్తులో కూడా దానికి అవకాశం పరిమితంగా ఉందని అధికారులు పేర్కొన్నట్లు నివేదికలు వెల్లడించాయి. దీంతో మహానది కోల్ఫీల్డ్స్, కోల్ ఇండియా వంటి సంస్థల నుంచి అవసరమైన బొగ్గును సమకూర్చుకునే చర్యలు ప్రారంభించాలని ప్రభుత్వం నిర్ణయించింది. ఈ అంశంపై కేంద్ర బొగ్గు శాఖ మంత్రి జి. కిషన్ రెడ్డితో ఉప ముఖ్యమంత్రి భట్టి విక్రమార్క చర్చించాలని ముఖ్యమంత్రి సూచించారు.

---------------

హిందూస్తాన్ సమచార్ / పుట్టా సుమన్