హైదరాబాద్, 10 సెప్టెంబర్ (హి.స.)

శేరిలింగంపల్లి మండలం గచ్చిబౌలిలో 600 గజాల స్థలాన్ని హైడ్రా కాపాడింది. బహిరంగ మార్కెట్లో ఈ స్థలం విలువ సుమారు రూ.11 కోట్ల వరకూ ఉంటుందని అంచనా. తెలంగాణ సెక్రటేరియట్ మ్యూచ్యువల్ ఎయిడెడ్ కోపరేటివ్ సొసైటీకి చెందిన 24 ఎకరాల లేఔట్లో రెండు పార్కుల చుట్టూ హైడ్రా ఫెన్సింగ్ వేసింది. హెచ్ఎండీఏ అనుమతి పొందిన ఈ లేఔట్లో పార్కులు, ప్రజావసరాలకు ఉద్దేశించిన స్థలాలను సొసైటీ నిర్వాహకులు అమ్మినట్టు ఇటీవల హైడ్రాకు ఫిర్యాదులు అందాయి. ఈ నేపథ్యంలో హైడ్రా ఆ స్థలాలను క్షేత్ర స్థాయిలో పరిశీలించింది. పార్కుల స్థలాలుగా నిర్ధారించుకున్న తర్వాత ఆక్రమణలను తొలగించి చుట్టూ ఫెన్సింగ్ వేసింది. ఈ మేరకు హైడ్రా పరిరక్షించిన పార్కు స్థలంగా పేర్కొంటూ హెచ్చరికల బోర్డులు కూడా ఏర్పాటు చేసింది.

హిందూస్తాన్ సమచార్ / బచ్చు రంజిత్ రావు