వరంగల్ , 19 అక్టోబర్ (హి.స.)వరంగల్ నగరంలోని ప్రసిద్ధ శ్రీ భద్రకాళి దేవాలయంలో శరన్నవరాత్రి ఉత్సవాలు అత్యంత వైభవంగా జరుగుతున్నాయి. ఉత్సవాల్లో అత్యంత కీలకమైన 9వ రోజు (మహానవమి) సందర్భంగా అమ్మవారు దుష్టశిక్షణ, శిష్టరక్షణకు ప్రతీక అయిన 'మహిషాసుర మర్దిని' రూపంలో భక్తులకు దివ్య దర్శనమిస్తున్నారు.

ఆశ్వయుజ శుద్ధ నవమి సందర్భంగా అమ్మవారిని శూలం, ఖడ్గం, చక్రం తదితర వివిధ ఆయుధాలతో రౌద్ర, రక్షణ స్వరూపిణిగా విశేషంగా అలంకరించారు. ఈ పవిత్ర పర్వదినాన్ని పురస్కరించుకుని తెల్లవారుజాము నుంచే ఆలయంలో విశేష అభిషేకాలు, నవావరణ పూజలు మరియు చండీ హోమం ఘనంగా నిర్వహించారు. సాయంత్రం వేళ ఆలయంలో మహానవమి సందర్భంగా ప్రత్యేక బలిహరణ, కుంకుమార్చనలు కొనసాగనున్నాయి.

మహానవమి పర్వదినం కావడంతో తెలంగాణ వ్యాప్తంగా వేలాదిగా భక్తులు భద్రకాళి ఆలయానికి తరలివచ్చి అమ్మవారిని దర్శించుకుంటున్నారు. జై భద్రకాళి, జై మాతాజీ స్మరణలతో ఓరుగల్లు క్షేత్రం ఆధ్యాత్మిక శోభతో మారుమోగుతోంది. భక్తుల సౌకర్యార్థం ఆలయ అధికారులు, పోలీసులు ప్రత్యేక క్యూలైన్లు, భద్రతా ఏర్పాట్లను పర్యవేక్షిస్తున్నారు.

---------------

హిందూస్తాన్ సమచార్ / పుట్టా సుమన్