అమరావతి , 07 అక్టోబర్ (హి.స.)

వైయస్ఆర్ కాంగ్రెస్ పార్టీ ప్రభుత్వ హయాంలో జరిగినట్లు ఆరోపణలు ఎదుర్కొంటున్న మద్యం రవాణా మరియు టెండర్ల కుంభకోణం కేసు రాజకీయంగా తీవ్ర కలకలం రేపుతోంది. ఈ కేసులో విచారణను వేగవంతం చేసిన ప్రత్యేక దర్యాప్తు బృందం (SIT) అధికారులు, వైయస్ఆర్సీపీ ప్రభుత్వంలో మాజీ మంత్రిగా పనిచేసిన కారుమూరి నాగేశ్వరరావును మూడో రోజు కూడా తమ కస్టడీకి తీసుకుని విచారణ కొనసాగిస్తున్నారు. విజయవాడలోని సిట్ ప్రధాన కార్యాలయంలో ఆయనను సుదీర్ఘంగా ప్రశ్నిస్తున్నారు.

గత ప్రభుత్వ హయాంలో మద్యం సిండికేట్లు, డిస్టిలరీల కేటాయింపులు, టెండర్ల ప్రక్రియలో జరిగిన నిబంధనల ఉల్లంఘనలు మరియు భారీగా చేతులు మారిన ముడుపుల గురించిన కీలక వివరాలను సిట్ అధికారులు రాబడుతున్నారు. నాటి ప్రభుత్వ పెద్దల హస్తం ఏ మేరకు ఉందనే కోణంలో మాజీ మంత్రిని అధికారులు కఠినంగా ప్రశ్నిస్తున్నట్లు సమాచారం. అయితే, ఈ విచారణ రాజకీయ కక్షసాధింపు చర్యల్లో భాగమేనని, తాము ఎలాంటి నిబంధనలను ఉల్లంఘించలేదని వైయస్ఆర్సీపీ వర్గాలు ఖండిస్తున్నాయి. ఏది ఏమైనప్పటికీ, ఈ కేసులో వస్తున్న వరుస పరిణామాలు ఏపీ రాజకీయాల్లో తీవ్ర చర్చనీయాంశంగా మారాయి.

---------------

హిందూస్తాన్ సమచార్ / పుట్టా సుమన్