హైదరాబాద్ , 13 నవంబర్ (హి.స.)భారత్ సమిట్ వేదికగా తెలంగాణ రాష్ట్ర అభివృద్ధి, ఆర్థిక సమానత్వంపై టీపీసీసీ అధ్యక్షుడు మహేశ్ గౌడ్ కీలక వ్యాఖ్యలు చేశారు. సమిట్లో నిర్వహించిన ‘తెలంగాణ రైజింగ్ – ఎకనామిక్ జస్టిస్’ కార్యక్రమానికి ఆయన హాజరై రాష్ట్ర అభివృద్ధికి సంబంధించిన పలు అంశాలను ప్రస్తావించారు.

తెలంగాణ రాష్ట్రం ఏర్పడిన ప్రధాన లక్ష్యాల్లో సమాన అభివృద్ధి, అన్ని ప్రాంతాల ప్రజలకు ఉపాధి అవకాశాలు కల్పించడం ముఖ్యమైనవని మహేశ్ గౌడ్ పేర్కొన్నారు. రాష్ట్రంలోని ప్రతి ప్రాంతం అభివృద్ధి చెందాలని, అభివృద్ధి ఫలాలు అన్ని వర్గాలకు సమానంగా అందాలని ఆకాంక్షించారు. కేవలం కొన్ని ప్రాంతాలకే అభివృద్ధి పరిమితం కాకుండా గ్రామీణ ప్రాంతాలు, వెనుకబడిన జిల్లాలకు కూడా తగిన ప్రాధాన్యత ఇవ్వాల్సిన అవసరం ఉందని అభిప్రాయపడ్డారు.

ప్రస్తుతం తెలంగాణ రాష్ట్రానికి వచ్చే మొత్తం ఆదాయంలో సుమారు 40 శాతం హైదరాబాద్ నగరం నుంచే సమకూరుతోందని ఆయన వెల్లడించారు. ఈ పరిస్థితి రాష్ట్రంలో ప్రాంతాల మధ్య అభివృద్ధి అసమతుల్యతను సూచిస్తోందని వ్యాఖ్యానించారు. హైదరాబాద్తో పాటు ఇతర జిల్లాల్లోనూ పరిశ్రమలు, పెట్టుబడులు, ఉపాధి అవకాశాలు పెరిగేలా చర్యలు తీసుకోవాలని సూచించారు.

అన్ని ప్రాంతాలకు సమాన అవకాశాలు కల్పించినప్పుడే తెలంగాణ సమగ్ర అభివృద్ధి సాధ్యమవుతుందని మహేశ్ గౌడ్ పేర్కొన్నారు.

---------------

హిందూస్తాన్ సమచార్ / పుట్టా సుమన్