హైదరాబాద్ , 14 నవంబర్ (హి.స.)

హైదరాబాద్లోని హఫీజ్పేట ప్రాంతంలో అగ్నిప్రమాదం చోటుచేసుకుంది. స్థానికంగా ఉన్న ఓ పెయింటింగ్ దుకాణంలో అకస్మాత్తుగా మంటలు చెలరేగడంతో పరిసర ప్రాంతాల్లో ఆందోళన నెలకొంది. దుకాణం నుంచి దట్టమైన పొగ వెలువడటాన్ని గమనించిన స్థానికులు వెంటనే అగ్నిమాపక శాఖ అధికారులకు సమాచారం అందించారు.

సమాచారం అందుకున్న అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. రెండు ఫైరింజన్ల సహాయంతో మంటలను అదుపులోకి తీసుకొచ్చేందుకు చర్యలు చేపట్టారు. కొంతసేపు శ్రమించి దుకాణంలో వ్యాపించిన మంటలను పూర్తిగా ఆర్పివేశారు. దీంతో మంటలు సమీపంలోని ఇతర దుకాణాలకు వ్యాపించకుండా అడ్డుకోగలిగారు.

అయితే ప్రమాదం జరిగిన సమయంలో దుకాణంలో ఎవరూ లేకపోవడంతో పెను ప్రమాదం తప్పింది. ఎలాంటి ప్రాణనష్టం జరగకపోవడంతో స్థానికులు ఊపిరి పీల్చుకున్నారు. అగ్నిప్రమాదానికి గల కారణాలు, దుకాణంలో జరిగిన ఆస్తి నష్టం వివరాలు తెలియాల్సి ఉంది. విద్యుత్ షార్ట్ సర్క్యూట్ కారణమా లేదా ఇతర కారణాల వల్ల మంటలు చెలరేగాయా అనే అంశంపై అధికారులు పరిశీలన చేపట్టే అవకాశం ఉంది. ఈ ఘటనతో హఫీజ్పేట పరిసర ప్రాంతాల్లో కొద్దిసేపు కలకలం నెలకొంది.

---------------

హిందూస్తాన్ సమచార్ / పుట్టా సుమన్