హైదరాబాద్ , 14 నవంబర్ (హి.స.)

భద్రాద్రి కొత్తగూడెం జిల్లాలో జరిగిన రోడ్డు ప్రమాదం ఇద్దరి ప్రాణాలను బలిగొంది. టేకులపల్లి మండల పరిధిలోని ఆరో మైలు వద్ద లారీ, ద్విచక్రవాహనం ఎదురెదురుగా ఢీకొన్నాయి. ఈ ప్రమాదంలో బైక్పై ప్రయాణిస్తున్న ఇద్దరు వ్యక్తులు తీవ్రంగా గాయపడి ఘటనాస్థలంలోనే ప్రాణాలు కోల్పోయారు.

స్థానికుల సమాచారం ప్రకారం.. ఆరో మైలు సమీపంలో లారీ, ద్విచక్రవాహనం ఢీకొనడంతో ఒక్కసారిగా భారీ శబ్దం వినిపించింది. ప్రమాదాన్ని గమనించిన చుట్టుపక్కల వారు వెంటనే అక్కడికి చేరుకున్నారు. అయితే అప్పటికే బైక్పై ఉన్న ఇద్దరూ మృతి చెందడంతో విషాదం నెలకొంది.

సమాచారం అందుకున్న పోలీసులు ఘటనాస్థలానికి చేరుకుని ప్రమాద వివరాలను పరిశీలించారు. మృతదేహాలను స్వాధీనం చేసుకుని తదుపరి చర్యలు చేపట్టారు. ప్రమాదానికి గల కారణాలు, మృతుల వివరాలు తెలియాల్సి ఉంది. లారీ వేగం, రహదారి పరిస్థితులు ప్రమాదానికి కారణమయ్యాయా అనే కోణంలో పోలీసులు విచారణ చేపట్టే అవకాశం ఉంది.

ఈ ఘటనతో టేకులపల్లి మండలంలో విషాద ఛాయలు అలుముకున్నాయి. రోడ్డు ప్రమాదంలో ఇద్దరు ప్రాణాలు కోల్పోవడంతో స్థానికులు ఆవేదన వ్యక్తం చేశారు.

---------------

హిందూస్తాన్ సమచార్ / పుట్టా సుమన్