న్యూఢిల్లీ, 14 నవంబర్ (హి.స.)

మణిపూర్ రాష్ట్రంలో 2023లో చెలరేగిన జాతుల మధ్య హింసాకాండకు దారితీసిన పరిస్థితులపై విచారణ జరుపుతున్న జ్యుడీషియల్ కమిషన్ గడువును కేంద్ర ప్రభుత్వం మరోసారి పొడిగించింది. సుప్రీంకోర్టు మాజీ న్యాయమూర్తి జస్టిస్ బల్బీర్ సింగ్ చౌహాన్ నేతృత్వంలోని ఈ త్రిసభ్య కమిషన్ పదవీకాలాన్ని మరో ఆరు నెలల పాటు పొడిగిస్తూ కేంద్ర హోంశాఖ తాజాగా అధికారిక నోటిఫికేషన్ జారీ చేసింది. 2023 జూన్ 4న ఏర్పాటైన ఈ కమిషన్‌కు కేంద్ర ప్రభుత్వం గడువు పెంచడం ఇది ఏడోసారి కావడం గమనార్హం.

తాజా ఉత్తర్వుల ప్రకారం, ఈ విచారణ కమిషన్ తన తుది నివేదికను వీలైనంత త్వరగా, అంటే 2027 మే 20వ తేదీలోగా కేంద్ర ప్రభుత్వానికి సమర్పించాల్సి ఉంటుంది. మణిపూర్‌లో 2023 మే నెలలో ప్రారంభమైన అల్లర్లలో సుమారు 260 మందికి పైగా ప్రాణాలు కోల్పోగా, వేలాది మంది నిరాశ్రయులయ్యారు. ఈ హింసాకాండ వెనుక ఉన్న కారణాలు, పరిపాలనాపరమైన వైఫల్యాలు, శాంతిభద్రతల పరిరక్షణలో అధికారుల పాత్రను లోతుగా విశ్లేషించేందుకు కేంద్రం ఈ కమిషన్‌ను నియమించింది.

అయితే, ఈ కమిషన్ ఛైర్మన్ బాధ్యతలలో మార్పులు జరగడం గడువు పొడిగింపునకు ఒక కారణమైంది. గతంలో కమిషన్ ఛైర్మన్‌గా ఉన్న గౌహతి హైకోర్టు మాజీ ప్రధాన న్యాయమూర్తి జస్టిస్ అజయ్ లాంబా వ్యక్తిగత కారణాలతో రాజీనామా చేయడంతో, 2025 అక్టోబర్‌లో జస్టిస్ బి.ఎస్. చౌహాన్‌ను నూతన ఛైర్మన్‌గా కేంద్రం నియమించింది. ప్రస్తుతం ఈ కమిషన్‌లో రిటైర్డ్ ఐఏఎస్ అధికారి హిమాన్షు శేఖర్ దాస్, రిటైర్డ్ ఐపీఎస్ అధికారి అలోక్ ప్రభాకర్ సభ్యులుగా కొనసాగుతున్నారు

---------------

హిందూస్తాన్ సమచార్ / Santhosha Laxmi