న్యూఢిల్లీ, 14 నవంబర్ (హి.స.)

దేశ రాజధాని ఢిల్లీలో మణిపూర్ రాష్ట్ర సంప్రదాయ పండుగ 'నింగోల్ చక్-కౌబా' (Ningol Chak-kouba) అత్యంత వైభవంగా, సామాజిక సామరస్య వాతావరణంలో జరిగింది. సాంస్కృతిక వారసత్వం, ఐక్యతను చాటిచెబుతూ ఢిల్లీ మీతీ కో-ఆర్డినేటింగ్ కమిటీ (DMCC) మరియు మీతీ యుంఫమ్ ఛారిటబుల్ ట్రస్ట్ సంయుక్తంగా నవంబర్ 11న జండేవాలన్‌లోని డాక్టర్ అంబేద్కర్ భవన్‌లో హియాంగే నిని పాన్బా: 3వ నింగోల్ చక్-కౌబా 2026 పేరుతో ఈ వేడుకలను నిర్వహించాయి. మణిపూర్‌కు చెందిన మీతీ, తంగ్‌ఖుల్, రోంగ్‌మీ, మీతీ పంగల్, చిరు వంటి విభిన్న తెగలతో పాటు దేశంలోని ఇతర ప్రాంతాలకు చెందిన ప్రజలు పెద్ద ఎత్తున పాల్గొని ఈ వేడుకలను విజయవంతం చేశారు.

మణిపూర్ సంస్కృతిలో 'నింగోల్ చక్-కౌబా'కు అత్యంత విశిష్ట స్థానం ఉంది. వివాహమై అత్తారింటికి వెళ్లిన ఆడపడుచులు తమ పుట్టింటికి వచ్చి తల్లిదండ్రులు, తోబుట్టువులతో ఆత్మీయంగా కలుసుకునే అద్భుతమైన వేడుక ఇది. కుటుంబ బంధాలను మరింత బలోపేతం చేయడంతో పాటు, సమాజంలో మహిళలకు ఉన్న గౌరవాన్ని, ప్రాధాన్యతను ఈ పండుగ చాటిచెబుతుంది. వేడుకలో భాగంగా మణిపురి మహిళలు తమ సంప్రదాయ వస్త్రధారణలో మెరిసిపోతూ సందడి చేశారు.

ఈ సందర్భంగా డీఎంసీసీ కన్వీనర్ బిరమణి సనసమ్ మాట్లాడుతూ... సొంత రాష్ట్రానికి దూరంగా ఢిల్లీ వంటి మెట్రోపాలిటన్ నగరాల్లో నివసిస్తున్న ప్రజలను తమ మూలాలతో, సంస్కృతితో అనుసంధానించడానికి ఇటువంటి వేడుకలు ఎంతగానో దోహదపడతాయని అన్నారు. మారుతున్న పట్టణ జీవనశైలి మధ్య నేటి యువతరానికి తమ పూర్వీకుల సంప్రదాయాలను పరిచయం చేసి, వాటిని కాపాడుకునేలా చేయడమే తమ లక్ష్యమని తెలిపారు. ప్రాంతీయ, భాషా సరిహద్దులను చెరిపేసి విభిన్న వర్గాల ప్రజల మధ్య పరస్పర గౌరవం, శాంతియుత సహజీవనాన్ని పెంపొందించడంలో ఇలాంటి సాంస్కృతిక ఉత్సవాలు వారధిగా నిలుస్తాయని నిర్వాహకులు పేర్కొన్నారు.

---------------

హిందూస్తాన్ సమచార్ / Santhosha Laxmi