న్యూఢిల్లీ , 14 నవంబర్ (హి.స.)

భారత్-ఈజిప్టు దేశాల మధ్య ద్వైపాక్షిక వాణిజ్యం, పెట్టుబడులు మరియు పారిశ్రామిక సహకారాన్ని మరింత విస్తరించే లక్ష్యంతో కేంద్ర వాణిజ్య, పరిశ్రమల శాఖ మంత్రి పీయూష్ గోయల్ నవంబర్ 15, 16 తేదీలలో ఈజిప్టులో అధికారిక పర్యటన చేపట్టనున్నారు. ఈ పర్యటనలో ఆయన వెంట 130 మందికి పైగా భారత పారిశ్రామికవేత్తలు, స్టార్టప్ ప్రతినిధులతో కూడిన ఉన్నత స్థాయి వాణిజ్య బృందం కూడా వెళ్తోంది.

కేంద్ర వాణిజ్య మంత్రిత్వ శాఖ వివరాల ప్రకారం, ఆదివారం (నవంబర్ 15) కైరోలో జరగనున్న 7వ 'భారత్-ఈజిప్టు జాయింట్ ట్రేడ్ కమిటీ' సమావేశానికి ఈజిప్టు పెట్టుబడులు, విదేశీ వాణిజ్య శాఖ మంత్రి డాక్టర్ మొహమ్మద్ ఫరీద్ సలేహ్‌తో కలిసి పీయూష్ గోయల్ సహ-అధ్యక్షత వహించనున్నారు. మంత్రివర్గ స్థాయికి ఉన్నతీకరించిన ఈ కమిటీ సమావేశంలో మార్కెట్ యాక్సెస్, ఫార్మా, హెల్త్‌కేర్, వ్యవసాయ ఉత్పత్తులు, ఇంజినీరింగ్ వస్తువులు, ఎరువులు, వస్త్రాలు, ఎంఎస్ఎంఈలు (MSMEs), పునరుత్పాదక ఇంధనం, గ్రీన్ హైడ్రోజన్ మరియు లాజిస్టిక్స్ వంటి కీలక రంగాలలో సహకారంపై విస్తృతంగా చర్చించనున్నారు.

గత ఏడాదితో పోలిస్తే ఏప్రిల్-సెప్టెంబర్ 2026 మధ్య కాలంలో ఇరు దేశాల ద్వైపాక్షిక వస్తు వాణిజ్యం 64 శాతం వృద్ధి చెంది 5.04 బిలియన్ డాలర్లకు చేరుకుంది. 2025-26 ఆర్థిక సంవత్సరంలో భారత్ ఈజిప్టుకు 3.87 బిలియన్ డాలర్ల విలువైన వస్తువులను ఎగుమతి చేయగా, 2.60 బిలియన్ డాలర్ల దిగుమతులు చేసుకుంది.

ఈ పర్యటనలో భాగంగా భారత్-ఈజిప్టు జాయింట్ బిజినెస్ కౌన్సిల్ సమావేశం, బిజినెస్ ఫోరం నిర్వహించనున్నారు. అలాగే ఆఫ్రికన్ ఎక్స్‌పోర్ట్-ఇంపోర్ట్ బ్యాంక్, ఈజిప్టు-ఇండియా స్టార్టప్ ఫోరం ప్రతినిధులతో గోయల్ భేటీ కానున్నారు. ముఖ్యంగా ఆఫ్రికా, పశ్చిమాసియా, ఐరోపా మార్కెట్లకు ముఖద్వారంగా ఉన్న 'సూయజ్ కెనాల్ ఎకనామిక్ జోన్'లో పెట్టుబడులు, తయారీ, ఓడరేవులు, ప్రాంతీయ సరఫరా గొలుసుల బలోపేతంపై ఇరు దేశాలు ప్రధానంగా దృష్టి సారించనున్నాయి.

---------------

హిందూస్తాన్ సమచార్ / Santhosha Laxmi