అమరావతి , 03 నవంబర్ (హి.స.)

కృష్ణా జిల్లాలోని పెడన మున్సిపాలిటీ ఛైర్పర్సన్ ఎన్నికల్లో జనసేన పార్టీ విజయకేతనం ఎగురవేసింది. జనసేన తరఫున పోటీ చేసిన జ్యోత్స్నరాణి భారీ మెజార్టీతో విజయం సాధించి ఛైర్పర్సన్ పదవిని దక్కించుకున్నారు. ఆమెకు ప్రత్యర్థుల నుంచి గట్టి పోటీ ఎదురైనా ఓటర్లు జనసేన అభ్యర్థికి స్పష్టమైన ఆధిక్యాన్ని అందించారు.

ఈ ఎన్నికల్లో జ్యోత్స్నరాణి ఏకంగా 4,380 ఓట్ల మెజార్టీ సాధించడం రాజకీయంగా ప్రాధాన్యత సంతరించుకుంది. ఈ ఫలితంతో పెడన మున్సిపాలిటీలో జనసేన పార్టీ తన బలాన్ని చాటుకుంది. ఎన్నికల ఫలితాలు వెలువడిన వెంటనే జనసేన శ్రేణులు, కూటమి నాయకులు, కార్యకర్తలు సంబరాలు జరుపుకున్నారు. జ్యోత్స్నరాణికి అభినందనలు తెలియజేస్తూ విజయోత్సవాలు నిర్వహించారు.

మున్సిపాలిటీ పరిధిలో ప్రజలు తనపై ఉంచిన నమ్మకాన్ని నిలబెట్టుకుంటానని, పట్టణ అభివృద్ధికి ప్రాధాన్యత ఇస్తానని ఆమె పేర్కొన్నారు. తాగునీరు, పారిశుద్ధ్యం, రహదారులు, మౌలిక సదుపాయాల మెరుగుదలకు కృషి చేయాల్సిన బాధ్యత ఇప్పుడు కొత్త ఛైర్పర్సన్పై ఉంది.

---------------

హిందూస్తాన్ సమచార్ / పుట్టా సుమన్