విశాఖ, 06 నవంబర్ (హి.స.)

విశాఖ స్టీల్ ప్లాంట్ యాజమాన్యం 11 మంది ఉద్యోగులపై క్రమశిక్షణ చర్యలు తీసుకుంది. వారిని విధుల నుంచి సస్పెండ్ చేస్తూ నిర్ణయం ప్రకటించింది. ప్లాంట్లోని మిల్స్ విభాగంలో ఆశించిన స్థాయిలో ఉత్పత్తి నమోదు కాకపోవడమే ఈ చర్యకు కారణంగా తెలుస్తోంది.

కర్మాగారంలో ఉత్పత్తి లక్ష్యాలను చేరుకోవడంపై యాజమాన్యం ప్రత్యేక దృష్టి పెట్టిన నేపథ్యంలో ఈ పరిణామం చోటుచేసుకుంది. మిల్స్ విభాగంలో ఉత్పత్తి తగ్గడాన్ని తీవ్రంగా పరిగణించిన అధికారులు, బాధ్యులుగా భావించిన 11 మంది ఉద్యోగులపై సస్పెన్షన్ వేటు వేశారు. ఉత్పత్తి సామర్థ్యాన్ని పెంచడం, నిర్దేశించిన లక్ష్యాలను సాధించడం కోసం యాజమాన్యం చర్యలు చేపడుతున్నట్లు తెలుస్తోంది.

అయితే ఉద్యోగుల సస్పెన్షన్ నిర్ణయం స్టీల్ ప్లాంట్ వర్గాల్లో చర్చనీయాంశంగా మారింది. ఉత్పత్తి తగ్గడానికి గల కారణాలు, ఉద్యోగులపై తీసుకున్న చర్యల విషయంలో మరిన్ని వివరాలు తెలియాల్సి ఉంది. యాజమాన్యం నిర్ణయంపై కార్మిక వర్గాల స్పందన ఎలా ఉంటుందనేది ఆసక్తికరంగా మారింది.

---------------

హిందూస్తాన్ సమచార్ / పుట్టా సుమన్