అనంతపురం, 07 నవంబర్ (హి.స.)

ఆంధ్రప్రదేశ్ స్థానిక సంస్థల ఎన్నికల ఓట్ల లెక్కింపు ప్రక్రియలో భాగంగా అనంతపురం జిల్లాలోని ప్రధాన కౌంటింగ్ కేంద్రం వెలుపల శనివారం తీవ్ర ఉద్రిక్త వాతావరణం నెలకొంది. లెక్కింపు కేంద్రం లోపలికి వెళ్లేందుకు ప్రధాన రాజకీయ పార్టీల కార్యకర్తలు, మద్దతుదారులు భారీ సంఖ్యలో తరలిరావడంతో నెట్టివేతలు, ఘర్షణ పూరిత పరిస్థితులు ఏర్పడ్డాయి.

పోలీసులు తెలిపిన వివరాల ప్రకారం... కౌంటింగ్ సెంటర్ ప్రధాన ద్వారం వద్దకు అనుమతి లేని వ్యక్తులు, ఏజెంట్ కాని ప్రతినిధులు ఒకేసారి చొచ్చుకెళ్లేందుకు ప్రయత్నించారు. భద్రతా సిబ్బంది వారిని నిరోధించేందుకు ప్రయత్నించినప్పటికీ, ఇరువర్గాల మధ్య వాగ్వాదం జరిగి పరిస్థితి అదుపు తప్పింది. ఈ క్రమంలో రద్దీ తీవ్రమవ్వడం, కౌంటింగ్ కేంద్రం భద్రతకు విఘాతం కలిగే ప్రమాదం ఏర్పడటంతో ఆందోళనకారులను చెదరగొట్టేందుకు పోలీసులు బలవంతంగా లాఠీఛార్జ్ చేయాల్సి వచ్చింది.

లాఠీఛార్జ్ ధాటికి చెల్లాచెదురైన కార్యకర్తలు కౌంటింగ్ కేంద్రం పరిసరాల నుంచి పరుగులు తీశారు. ఈ ఘటనలో పలువురు కార్యకర్తలకు తేలికపాటి గాయాలయ్యాయి. పరిస్థితిని అదుపులోకి తెచ్చేందుకు జిల్లా ఎస్పీ ఆదేశాల మేరకు అదనపు పోలీసు బలగాలను, ఏఆర్‌ సిబ్బందిని కౌంటింగ్ సెంటర్ ప్రాంగణంలో మోహరించారు.

ప్రస్తుతం కౌంటింగ్ కేంద్రం వద్ద పోలీసులు పిక్టింగ్ ఏర్పాటు చేసి, 144 సెక్షన్ నిబంధనలను కఠినంగా అమలు చేస్తున్నారు. పాస్‌లు ఉన్న కౌంటింగ్ ఏజెంట్లను మాత్రమే తనిఖీ చేసి లోపలికి అనుమతిస్తున్నారు. ఈ ఘటనపై విచారణ జరిపి చట్టాన్ని చేతుల్లోకి తీసుకున్న వారిపై కఠిన చర్యలు తీసుకుంటామని సీనియర్ పోలీస్ అధికారులు స్పష్టం చేశారు.

---------------

హిందూస్తాన్ సమచార్ / Santhosha Laxmi