హైదరాబాద్, 14 మార్చి (హి.స.)తెలంగాణ మంత్రి సీతక్క శనివారం కేంద్ర మహిళాశిశు సంక్షేమశాఖ మంత్రి అన్నపూర్ణ దేవిని కలిశారు. నిర్భయ నిధి కింద ములుగు జిల్లాను ఎంపిక చేయడంపై కేంద్ర మంత్రికి కృతజ్ఞతలు తెలిపారు. ఈ నిధులతో జిల్లాలో మహిళలు, బాలికల భద్రత, గౌరవం, రాకపోకల సౌకర్యాన్ని మెరుగుపరిచేందుకు.. మౌలిక సదుపాయాల కల్పన, మెరుగైన నిఘా వ్యవస్థలు, అత్యవసర ప్రతిస్పందన వ్యవస్థలను ఏర్పాటు చేయనున్నట్లు చెప్పారు. ఈ ప్రాజెక్టును విజయవంతంగా అమలు చేసేందుకు డీపీఆర్ తయారు చేస్తున్నట్లు తెలిపారు. ఈ విషయంలో జిల్లా యంత్రాంగానికి రాష్ట్ర మహిళాశిశు సంక్షేమశాఖ పూర్తి సహకారాన్ని అందిస్తుందన్నారు.

కేంద్ర ప్రభుత్వం అమలు చేస్తున్న ‘పాలనా’ పథకం కింద పనిచేస్తున్న క్రెచ్ వర్కర్లు, హెల్పర్ల గౌరవ వేతనాలను పెంచాలని మంత్రి సీతక్క ఈ సందర్భంగా కోరారు. ప్రస్తుత మార్గదర్శకాల ప్రకారం క్రెచ్ వర్కర్లకు నెలకు రూ.5,500, హెల్పర్లకు రూ.3,000 మాత్రమే గౌరవ వేతనంగా ఇస్తున్నారని.. వారు చేస్తున్న పనికి ఇది ఏమాత్రం సరిపోవడం లేదని తెలిపారు.

---------------

హిందూస్తాన్ సమచార్ / రాశి భాగాయత్