అమరావతి, 20 ఏప్రిల్ (హి.స.)ఆంధ్రప్రదేశ్ రాష్ట్రంలోని గ్రామ, వార్డు సచివాలయాల (Village and ward secretariats) సేవలను ప్రజలకు మరింత వేగంగా, పారదర్శకంగా అందించడమే లక్ష్యంగా ఏపీ ప్రభుత్వం కీలక అడుగు వేసింది. ‘స్వర్ణ గ్రామ, వార్డు కార్యాలయాల’ సమర్థ నిర్వహణ, సిబ్బంది పర్యవేక్షణ కోసం 19 జిల్లాలకు ప్రత్యేక అధికారులను నియమిస్తూ ఆదివారం ఉత్తర్వులు జారీ చేసింది. జిల్లా స్థాయిలో ప్రభుత్వ పథకాల అమలును సమన్వయం చేయడం, సిబ్బంది హాజరును పర్యవేక్షించడం మరియు ప్రజల నుంచి వచ్చే ఫిర్యాదులను ఎప్పటికప్పుడు పరిష్కరించడం ఈ అధికారుల ప్రధాన బాధ్యత.

ముఖ్యంగా ఈ అధికారులు మండల, గ్రామ స్థాయిలో ఉన్న ‘స్వర్ణ కార్యాలయాల’ ప్రొఫైల్ అప్డేట్, ర్యాంకింగ్లు, సచివాలయాల ద్వారా అందుతున్న సేవల నాణ్యతను క్షేత్రస్థాయిలో తనిఖీ చేస్తారు. తూర్పు గోదావరికి కె. రత్నకుమారి, విశాఖపట్నానికి ఆర్. పూర్ణమాదేవి, కర్నూలుకు టీవీ భాస్కర్ నాయుడు వంటి సీనియర్ అధికారులను పర్యవేక్షకులుగా కేటాయించారు. సచివాలయ వ్యవస్థలో జవాబుదారీతనాన్ని పెంచి, ప్రతి పౌరుడికి ప్రభుత్వ ఫలాలు సకాలంలో అందేలా చూడటమే ఈ ప్రత్యేక అధికారుల నియామకం వెనుక ఉన్న ప్రధాన ఉద్దేశం.

---------------

హిందూస్తాన్ సమచార్ / SANDHYA PRASADA PV