చెన్నై, 23 జూన్ (హి.స.)

మిళనాడు అసెంబ్లీలో గవర్నర్ ప్రసంగానికి ధన్యవాదాలు తెలిపే తీర్మానంపై ముఖ్యమంత్రి సి. జోసెఫ్ విజయ్ మాట్లాడుతుండగా, ప్రతిపక్ష ద్రవిడ మున్నేట్ర కజగం (DMK) ఎమ్మెల్యేలు సభ నుండి వాకౌట్ చేశారు. సభను ఉద్దేశించి సీఎం విజయ్ మాట్లాడుతూ.. సెక్యులర్ ప్రోగ్రెసివ్ అలయన్స్ భాగస్వామ్య పక్షాలైన కాంగ్రెస్, సిపిఐ(ఎం), ఇండియన్ యూనియన్ ముస్లిం లీగ్ (IUML) వంటి పార్టీలు తమ సొంత స్వయంప్రతిపత్తితో, స్వతంత్రంగా నిర్ణయాలు తీసుకుని తమ తమిళగ వెట్రి కజగం (TVK) ప్రభుత్వంతో చేతులు కలిపాయని స్పష్టం చేశారు. తమ కూటమి ఏర్పాటులో ఎలాంటి 'ఎమ్మెల్యేల కొనుగోళ్లు లేదా బేరసారాలు' (Horse-Trading) జరగలేదని ఆయన ఉద్ఘాటించారు. తమది ప్రజల మద్దతుతో నడుస్తున్న ప్రభుత్వమని, అధికారాన్ని నిలబెట్టుకోవడానికి అనైతిక రాజకీయాలు చేయాల్సిన అవసరం తమకు లేదని సీఎం పేర్కొన్నారు.

అయితే, సీఎం విజయ్ ప్రసంగిస్తూ గత డీఎంకే ప్రభుత్వ హయాంలో పార్టీ నిధుల పేరుతో భారీగా వసూళ్లకు పాల్పడ్డారని ఆరోపించడంపై ప్రతిపక్ష నేత ఉదయనిధి స్టాలిన్ తీవ్ర అభ్యంతరం వ్యక్తం చేశారు. ఈ వ్యాఖ్యలకు సమాధానం ఇచ్చేందుకు ఆయన స్పీకర్ జె.సి.డి. ప్రభాకర్ను సమయం కోరగా, దానికి అనుమతి నిరాకరించబడింది. ఆధారాలు లేకుండా ఇలాంటి నిరాధారమైన ఆరోపణలు చేయడం సరికాదని మండిపడుతూ, ఉదయనిధి స్టాలిన్ నాయకత్వంలో డీఎంకే ఎమ్మెల్యేలందరూ సభ నుండి నిరసనగా బయటకు నడిచారు. డీఎంకే కూటమి నుంచి లెఫ్ట్ పార్టీలు, ఐయూఎంఎల్ వంటి కీలక పక్షాలు విడిపోయి టీవీకే వైపు మొగ్గు చూపడంపై గత కొన్ని రోజులుగా తమిళనాడు రాజకీయాల్లో ఇరు పార్టీల మధ్య తీవ్ర విమర్శలు నడుస్తున్నాయి.

హిందూస్తాన్ సమచార్ / Santhosha Laxmi