విశాఖపట్నం, 11 జూలై (హి.స.)
ఆంధ్రప్రదేశ్ రాష్ట్రం దేశ రక్షణ మరియు ఏరోస్పేస్ తయారీ రంగానికి కొత్త 'పవర్హౌస్' (కీలక కేంద్రం)గా అవతరిస్తోందని కేంద్ర రక్షణ శాఖ మంత్రి రాజ్నాథ్ సింగ్ కొనియాడారు. శనివారం విశాఖపట్నంలో జరిగిన ఒక ఉన్నత స్థాయి అధికారిక కార్యక్రమంలో ప్రాజెక్ట్ 17A శ్రేణికి చెందిన అత్యాధునిక స్టీల్త్ ఫ్రిగేట్ (యుద్ధనౌక) 'ఐఎన్ఎస్ మహేంద్రగిరి'ని ఆయన నౌకాదళంలోకి కమిషన్ చేశారు.
ఈ సందర్భంగా జరిగిన సభలో రక్షణ మంత్రి మాట్లాడుతూ.. ఆంధ్రప్రదేశ్ శౌర్యానికి, గర్వానికి ప్రతీక అని, నేడు దేశ రక్షణ రంగంలో ఆకాశం, నీరు, భూమి మరియు అన్మ్యాన్డ్ (డ్రోన్) రంగాలన్నింటిలోనూ ఈ రాష్ట్రం కీలక పాత్ర పోషిస్తోందని ప్రశంసించారు. పుట్టపర్తిలో అడ్వాన్స్డ్ మీడియం కాంబాట్ ఎయిర్క్రాఫ్ట్ (AMCA) కోసం ఏర్పాటు చేసిన కోర్ ఇంటిగ్రేషన్ అండ్ ఫ్లైట్ టెస్టింగ్ సెంటర్, అనకాపల్లి జిల్లాలో నిర్మిస్తున్న భారత్ డైనమిక్స్ లిమిటెడ్ (BDL) నావల్ సిస్టమ్స్ మాన్యుఫ్యాక్చరింగ్ ఫెసిలిటీ, మరియు కర్నూలులో డ్రోన్ రంగం అభివృద్ధిని ఆయన ఉదహరించారు. గతంలో విదేశాల నుంచి దిగుమతి చేసుకునే ఆటోనమస్ అండర్ వాటర్ వెహికల్స్, టార్పెడోలు ఇకపై విశాఖ చెంతనే తయారవుతుండటం గర్వకారణమన్నారు.
ఈ రోజు నావికాదళంలో చేరిన ఐఎన్ఎస్ మహేంద్రగిరి దాదాపు 75 శాతానికి పైగా స్వదేశీ పరిజ్ఞానంతో, మజగాన్ డాక్ షిప్బిల్డర్స్ లిమిటెడ్ (MDL) ద్వారా నిర్మించబడింది. ఇది శత్రువుల రాడార్లకు దొరకకుండా బ్రహ్మోస్ క్షిపణులు, అధునాతన రాకెట్ లాంచర్లతో దాడి చేయగలదు. హిందూ మహాసముద్ర ప్రాంతంలో భారతదేశ ఆర్థిక ప్రయోజనాలను మరియు సముద్ర భద్రతను కాపాడటంలో ఈ యుద్ధనౌక కీలక పాత్ర పోషిస్తుందని రాజ్నాథ్ సింగ్ స్పష్టం చేశారు.
---------------
హిందూస్తాన్ సమచార్ / Santhosha Laxmi
