రాజౌరీ (జమ్మూ కాశ్మీర్), 21 జూలై (హి.స.)

జమ్మూ కాశ్మీర్‌లోని రాజౌరీ జిల్లాలో మంగళవారం తెల్లవారుజాము నుంచి భారీ వర్షాలు కురుస్తుండటంతో జిల్లా యంత్రాంగం, స్థానిక పోలీసులు ప్రజలకు అత్యవసర అడ్వైజరీ జారీ చేశారు. ఎడతెరిపి లేకుండా కురుస్తున్న వర్షాల కారణంగా నదుల్లో నీటి మట్టాలు వేగంగా పెరిగే అవకాశం ఉందని, ఫ్లాష్ ఫ్లడ్స్ (హఠాత్తుగా వచ్చే వరదలు), కొండచరియలు విరిగిపడటం మరియు రోడ్లపై నీరు నిలిచిపోయే ప్రమాదం ఉందని హెచ్చరించారు. ప్రజలు అత్యవసరమైతే తప్ప ఇళ్ల నుంచి బయటకు రావద్దని, నదీ తీర ప్రాంతాలు, కొండచరియలు విరిగిపడే ప్రమాదం ఉన్న ప్రాంతాలను తక్షణమే ఖాళీ చేయాలని పోలీసులు కోరారు. వరద నీరు ప్రవహిస్తున్న రోడ్లు, వంతెనలను దాటడానికి ప్రయత్నించవద్దని మరియు అత్యవసర సమయాల్లో స్థానిక అధికారులను సంప్రదించాలని సూచించారు.

మరోవైపు పొరుగు రాష్ట్రమైన హిమాచల్ ప్రదేశ్‌లో కూడా వర్షాల ఉధృతి కొనసాగుతోంది. తీవ్రమైన రెడ్ అలర్ట్ నేపథ్యంలో సిర్మౌర్ జిల్లాలోని విద్యాసంస్థలకు జూలై 20, 21 తేదీల్లో సెలవు ప్రకటించినట్లు డిప్యూటీ కమిషనర్ ప్రియాంక వర్మ తెలిపారు. ఈ వర్షాల కారణంగా రాష్ట్రవ్యాప్తంగా 36 రోడ్లు మూసుకుపోగా, 43 తాగునీటి సరఫరా పథకాలకు ఆటంకం ఏర్పడింది. వాతావరణ పరిస్థితుల వల్ల హిమాచల్ ప్రదేశ్ యూనివర్సిటీ పరీక్షలు యథాతథంగా జరుగుతుండగా, ఇగ్నో (IGNOU) పరీక్షలను మాత్రం వాయిదా వేసి, తదుపరి తేదీలను తర్వాత ప్రకటిస్తామని అధికారులు వెల్లడించారు.

---------------

హిందూస్తాన్ సమచార్ / Santhosha Laxmi