హైదరాబాద్, 22 జూలై (హి.స.)

ఆదాయానికి మించిన ఆస్తుల కేసులో భాగంగా తెలంగాణ రెడ్కో (REDCO) మరియు ట్రాన్స్‌కో డిప్యూటీ ఎగ్జిక్యూటివ్ ఇంజనీర్ (డీఈ) కె. వెంకటరమణ ఇళ్లు, కార్యాలయాలపై అవినీతి నిరోధక శాఖ (ఏసీబీ) అధికారులు బుధవారం తెల్లవారుజాము నుంచే ఉమ్మడిగా విరుచుకుపడ్డారు. హైదరాబాద్, వరంగల్, కరీంనగర్‌తో పాటు ఆంధ్రప్రదేశ్‌లోని ఆయనకు సంబంధించిన దాదాపు 15 ప్రాంతాలలో ఏసీబీ ప్రత్యేక బృందాలు ఏకకాలంలో ఈ సోదాలు నిర్వహించాయి. ఈ తనిఖీలలో వెంకటరమణ నివాసాలు, బంధువుల ఇళ్ల నుంచి భారీగా నగదు, కిలోల కొద్దీ బంగారు ఆభరణాలు, కోట్లాది రూపాయల విలువైన భూములు మరియు ఇళ్లకు సంబంధించిన కీలక ఆస్తి పత్రాలను అధికారులు స్వాధీనం చేసుకున్నారు. ఆయన సర్వీసు కాలంలో పెద్ద ఎత్తున అక్రమార్జనకు పాల్పడినట్లు వచ్చిన నమ్మకమైన సమాచారం, ఫిర్యాదుల ఆధారంగానే ఈ దాడులు చేపట్టినట్లు ఏసీబీ వర్గాలు వెల్లడించాయి. స్వాధీనం చేసుకున్న ఆస్తుల పూర్తి విలువను లెక్కించే పనిలో అధికారులు నిమగ్నమయ్యారు.

---------------

హిందూస్తాన్ సమచార్ / Santhosha Laxmi