హైదరాబాద్, 24 జూలై (హి.స.)
నీట్ (NEET-UG) పరీక్షల అక్రమాలు, పేపర్ లీకేజీలపై కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలనే డిమాండ్తో పాటు రాష్ట్రంలోని విద్యాసంస్థల సమస్యలను పరిష్కరించాలని కోరుతూ వామపక్ష విద్యార్థి సంఘాలు పిలుపునిచ్చిన తెలంగాణవ్యాప్త బంద్ విజయవంతమైంది. ఎస్ఎఫ్ఐ (SFI), ఏఐఎస్ఎఫ్ (AISF), పీడీఎస్యూ (PDSU) తదితర విద్యార్థి సంఘాల ఆధ్వర్యంలో జరిగిన ఈ బంద్కు రాష్ట్రంలోని విద్యాసంస్థలు స్వచ్ఛందంగా సహకరించాయి. ఇంటర్మీడియట్ స్థాయి నుంచి విశ్వవిద్యాలయాల వరకు ప్రైవేట్, ప్రభుత్వ విద్యాసంస్థలన్నీ నేడు పూర్తిగా మూతపడ్డాయి. ఈ బంద్ ప్రభావంతో ఉస్మానియా యూనివర్సిటీ (OU) అధికారులు ఈరోజు జరగాల్సిన అన్ని రకాల పరీక్షలను తాత్కాలికంగా వాయిదా వేస్తున్నట్లు ప్రకటించారు; వాయిదా పడిన పరీక్షల నూతన కాలపట్టికను త్వరలోనే వెల్లడిస్తామని తెలిపారు.
ఈ సందర్భంగా ఏఐఎస్ఎఫ్ రాష్ట్ర కార్యదర్శి పుట్ట లక్ష్మణ్ మాట్లాడుతూ.. విద్యార్థుల భవిష్యత్తుతో ఆడుకుంటున్న వారిపై కఠిన చర్యలు తీసుకోవడంలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని మండిపడ్డారు. బంద్లో భాగంగా రాజధాని హైదరాబాద్లోని నారాయణగూడ నుండి హిమాయత్నగర్ వరకు విద్యార్థులు, యువకులు భారీ ర్యాలీ నిర్వహించి ప్రభుత్వాలకు వ్యతిరేకంగా నినాదాలు చేశారు. ఈ నిరసనలకు కాంగ్రెస్, బీఆర్ఎస్ (BRS) పార్టీల అనుబంధ విభాగాలు కూడా మద్దతు ప్రకటించి వేర్వేరుగా ఆందోళనలు చేపట్టాయి. ఎలాంటి అవాంఛనీయ సంఘటనలు జరగకుండా నిరసనకారులను అడ్డుకునేందుకు పోలీసులు ప్రధాన కూడళ్ల వద్ద భారీగా మోహరించారు
---------------
హిందూస్తాన్ సమచార్ / Santhosha Laxmi
