హైదరాబాద్, 28 జూలై (హి.స.)

తెలంగాణ ప్రభుత్వం రాష్ట్రవ్యాప్తంగా ఎలక్ట్రానిక్ ‘తెలంగాణ ఫ్యామిలీ రిజిస్టర్’ (Telangana Family Register)ను ఏర్పాటు చేయడంతో పాటు, ‘మీసేవ’ ప్లాట్‌ఫామ్ ద్వారా కుటుంబ రిజిస్టర్ సర్టిఫికేట్ పొందే వెసులుబాటును అందుబాటులోకి తెచ్చింది. వివిధ ప్రభుత్వ సేవలు, పథకాలు పొందడానికి కుటుంబ సభ్యుల వివరాలతో కూడిన అధికారిక పత్రాలు లేక ప్రజలు పడుతున్న ఇబ్బందులను తొలగించేందుకు ఈ నిర్ణయం తీసుకున్నట్లు జీవోలో పేర్కొన్నారు. ఈ డిజిటల్ రిజిస్టర్‌లో కుటుంబ ఐడీ నంబర్, యజమాని మరియు సభ్యుల పేర్లు, వయస్సు, లింగం, ఆధార్ సంఖ్య మరియు ప్రస్తుత చిరునామా వంటి వివరాలు ఉంటాయి.

ఈ నిర్ణయాన్ని ఏఐఎంఐఎం (AIMIM) అధినేత అసదుద్దీన్ ఒవైసీ మరియు మైనార్టీ సంక్షేమ శాఖ సలహాదారు మహమ్మద్ అలీ షబ్బీర్ స్వాగతించారు. ఓటర్ల జాబితాల ప్రత్యేక సమగ్ర పరిశీలన (SIR) ప్రక్రియలో ఆమోదయోగ్యమైన 12 పత్రాలలో ఈ ఫ్యామిలీ రిజిస్టర్ సర్టిఫికేట్ ఒకటిగా ఉపయోగపడుతుందని, పత్రాలు లేని పేదలకు ఇది ఎంతో మేలు చేస్తుందని ఒవైసీ అభిప్రాయపడ్డారు.

మరోవైపు, ప్రతిపక్ష బీజేపీ ఈ నిర్ణయంపై తీవ్ర అభ్యంతరం వ్యక్తం చేసింది. ఓటర్ల జాబితా సమగ్ర పరిశీలన (SIR) సమయంలో తమ అనధికారిక లేదా అక్రమ ఓటు బ్యాంకులను కాపాడుకోవడానికే కాంగ్రెస్ ప్రభుత్వం హడావుడిగా ఈ సర్టిఫికేట్లను జారీ చేస్తోందని రాష్ట్ర బీజేపీ అధ్యక్షుడు ఎన్. రాంచందర్ రావు ఆరోపించారు. రోహింగ్యా, బంగ్లాదేశీ లేదా పాకిస్తానీ అక్రమార్కులకు ఓటరు జాబితాలో స్థానం లేకుండా చట్టపరంగా, ప్రజాక్షేత్రంలో పోరాడతామని ఆయన స్పష్టం చేశారు.

---------------

హిందూస్తాన్ సమచార్ / Santhosha Laxmi