విజయవాడ, 25 ఆగస్టు (హి.స.)

ఆంధ్రప్రదేశ్ రాజకీయాల్లోనూ, విజయవాడ నగరంలోనూ ఈరోజు ఉదయం ఒక్కసారిగా తీవ్ర కలకలం రేగింది. వైఎస్‌ఆర్‌సీపీ కీలక నేత, మాజీ మంత్రి జోగి రమేశ్‌ లక్ష్యంగా విజయవాడ ప్రెస్‌క్లబ్‌లో జరిగిన ఒక ప్రెస్‌మీట్ రాష్ట్రవ్యాప్తంగా సంచలనంగా మారింది. అనంత్‌ కృష్ణ గౌడ్‌ అనే వ్యక్తి ప్రెస్ మీట్ ఏర్పాటు చేసి, మాజీ మంత్రి జోగి రమేశ్ మరియు ఆయన కుటుంబ సభ్యులు తన కుమార్తె మేఘన జీవితాన్ని పూర్తిగా నాశనం చేశారంటూ కన్నీటి పర్యంతమవుతూ తీవ్రమైన ఆరోపణలు చేశారు. ఈ ఆరోపణలు రాజకీయ వర్గాల్లో పెద్ద ఎత్తున చర్చకు దారితీయడమే కాకుండా, నగరంలో శాంతిభద్రతల పరంగా కొంత ఉద్రిక్త వాతావరణాన్ని సృష్టించాయి.

అనంత్‌ కృష్ణ గౌడ్‌ విలేకరులతో మాట్లాడుతూ.. జోగి రమేశ్ తనకున్న రాజకీయ, ఆర్థిక అంగబలాన్ని ఉపయోగించుకుని తమ కుటుంబాన్ని తీవ్రంగా వేధింపులకు గురిచేశారని ఆరోపించారు. తన కుమార్తె జీవితాన్ని అంధకారంలోకి నెట్టేసినా, గత ప్రభుత్వ హయాంలో వారిపై ఫిర్యాదు చేసేందుకు భయపడ్డామని, ఇప్పుడు న్యాయం జరుగుతుందనే నమ్మకంతోనే బయటకు వచ్చామని తెలిపారు. ఈ వ్యవహారంపై తక్షణమే ఉన్నతాధికారులు మరియు ప్రస్తుత కూటమి ప్రభుత్వం స్పందించి సమగ్ర విచారణ జరిపించాలని ఆయన డిమాండ్ చేశారు. ఒకవేళ తమకు రెండు రోజుల్లో న్యాయం జరగకపోతే, తన కూతురితో కలిసి మాజీ మంత్రి జోగి రమేశ్ ఇంటి ముందే ఆమరణ నిరాహార ధర్నాకు దిగుతానని, తమకు ఏ ప్రమాదం జరిగినా జోగి రమేశ్ కుటుంబానిదే బాధ్యత అని ఆయన హెచ్చరించారు.

ఈ ప్రెస్ మీట్ ముగిసిన వెంటనే విజయవాడలోని జోగి రమేశ్ నివాసం వద్ద పోలీసులు ముందస్తు జాగ్రత్తగా భద్రతను పెంచారు. ఎటువంటి అవాంఛనీయ సంఘటనలు జరగకుండా నిఘా వర్గాలు అలర్ట్ అయ్యాయి. మరోవైపు, ఈ ఆరోపణలపై అధికార తెలుగుదేశం పార్టీ నేతలు స్పందిస్తూ.. గత ప్రభుత్వంలో మంత్రులుగా ఉన్నవారు అధికార బలంతో ఎలాంటి అక్రమాలకు, వేధింపులకు పాల్పడ్డారో ఈ ఘటనతో స్పష్టమవుతోందని విమర్శించారు. అయితే ఈ ఆరోపణలను జోగి రమేశ్ వర్గీయులు కొట్టిపారేస్తున్నారు. ఇవి కేవలం రాజకీయ కక్ష సాధింపు చర్యల్లో భాగంగా, తమ నేత ప్రతిష్టను దెబ్బతీయడానికి ప్రత్యర్థులు చేయిస్తున్న కుట్రలని వారు ఆరోపిస్తున్నారు. పోలీసులు ఈ వ్యవహారంపై ప్రాథమిక విచారణ ప్రారంభించారు.

---------------

హిందూస్తాన్ సమచార్ / Santhosha Laxmi