హైదరాబాద్ , 24 సెప్టెంబర్ (హి.స.)ఖైరతాబాద్ శాసనసభ్యుడు దానం నాగేందర్కు సర్వోన్నత న్యాయస్థానంలో ఊహించని షాక్ తగిలింది. ఆయన సభ్యత్వాన్ని రద్దు చేస్తూ తెలంగాణ హైకోర్టు ఇచ్చిన తీర్పును సుప్రీంకోర్టు సమర్థించింది. హైకోర్టు ఇచ్చిన నిర్ణయంపై స్టే ఇవ్వాలని ఆయన చేసిన అభ్యర్థనను న్యాయస్థానం స్పష్టంగా తోసిపుచ్చింది. పార్టీ ఫిరాయింపుల చట్టం కింద ఈ చర్య సరైనదేనని స్పష్టం చేస్తూ, అవసరమైతే మళ్లీ ఉపఎన్నిక బరిలో నిలవాలని సూచించింది. దీంతో ఆయన శాసనసభ్య పదవి అధికారికంగా కోల్పోయినట్లయింది.

గతంలో జరిగిన 2023 శాసనసభ ఎన్నికల్లో గులాబీ పార్టీ టికెట్పై ఖైరతాబాద్ నియోజకవర్గం నుంచి దానం నాగేందర్ విజయం సాధించారు. ఆ తర్వాత జరిగిన రాజకీయ పరిణామాల నేపథ్యంలో ఆయన హస్తం పార్టీలో చేరారు.

అంతేకాకుండా 2024 పార్లమెంట్ ఎన్నికల్లో సికింద్రాబాద్ లోక్సభ స్థానం నుంచి కాంగ్రెస్ ఎంపీ అభ్యర్థిగా కూడా పోటీ చేశారు. ఆయన పార్టీ మారిన వైనాన్ని సవాల్ చేస్తూ ప్రతిపక్ష బీఆర్ఎస్ అలాగే బీజేపీ నేతలు కోర్టును ఆశ్రయించారు. ఫిరాయింపు చట్టం ప్రకారం ఆయనపై అనర్హత వేటు వేయాలని న్యాయపోరాటం చేశారు.

ఈ వ్యాజ్యాలపై విచారణ జరిపిన రాష్ట్ర ఉన్నత న్యాయస్థానం గతంలోనే సంచలన తీర్పు వెలువరించింది. దానం నాగేందర్ను ఎమ్మెల్యే పదవికి అనర్హుడిగా ప్రకటిస్తూ, ఆ నియోజకవర్గం ఖాళీగా మారినట్లు ప్రకటించింది. ఈ తీర్పును సవాల్ చేస్తూ ఆయన సుప్రీంకోర్టును ఆశ్రయించినప్పటికీ ఊరట లభించలేదు. కోర్టు తీర్పు వెలువడే సమయానికి ఆయన ఖైరతాబాద్ వినాయక నిమజ్జన ఏర్పాట్లలో బిజీగా ఉన్నారు. తీర్పు వెలువడిన వెంటనే ఆయన నేరుగా ముఖ్యమంత్రి నివాసానికి వెళ్లినట్లు తెలుస్తోంది. ఈ పరిణామంతో ఖైరతాబాద్లో త్వరలోనే ఉపఎన్నిక జరిగే అవకాశం స్పష్టమైంది.

---------------

హిందూస్తాన్ సమచార్ / పుట్టా సుమన్