హైదరాబాద్, 30 సెప్టెంబర్ (హి.స.)

హైదరాబాద్ నగరంలో రోడ్డు ప్రమాదాలు కలకలం సృష్టిస్తున్నాయి. వేగంగా వస్తున్న వాహనాలు అమాయకుల ప్రాణాలను బలిగొంటున్నాయి. తాజాగా ఉస్మానియా యూనివర్సిటీ (OU) పరిధిలోని ప్రముఖ విద్యా సంస్థ ఇఫ్లూ (EFLU) ప్రాంతంలో జరిగిన ఘోర రోడ్డు ప్రమాదంలో ఒకరు ప్రాణాలు కోల్పోయారు.

నగరంలోని రద్దీగా ఉండే ప్రాంతాలలో ఒకటైన ఇఫ్లూ క్యాంపస్ సమీపంలో ఈ దుర్ఘటన చోటుచేసుకుంది. బాధితుడు తన స్కూటీపై వెళ్తుండగా, వెనుక నుంచి అతివేగంగా వచ్చిన ఒక టిప్పర్ లారీ అంతుచిక్కని రీతిలో ఢీకొట్టింది. ఈ ప్రమాద తీవ్రతకు స్కూటీపై ఉన్న వ్యక్తి రోడ్డుపై పడిపోగా, లారీ చక్రాలు ఆయనపై నుంచి వెళ్లడంతో అతను అక్కడికక్కడే దుర్మరణం చెందారు. మృతుడికి సంబంధించిన పూర్తి వివరాలు తెలియాల్సి ఉంది.

ప్రమాదం జరిగిన వెంటనే అప్రమత్తమైన స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం ఉస్మానియా ఆసుపత్రి మార్చురీకి తరలించారు. ఈ ఘటనపై కేసు నమోదు చేసుకున్న పోలీసులు, ప్రమాదానికి కారణమై లారీని అక్కడే వదిలేసి పరారైన డ్రైవర్ కోసం గాలింపు చర్యలు చేపట్టారు. చుట్టుపక్కల ఉన్న సీసీటీవీ పుటేజీలను పరిశీలిస్తున్నట్లు తెలిపారు. నగరంలో పెరుగుతున్న టిప్పర్ల రాకపోకలు, వేగంగా వెళ్లే వాహనాల వల్ల పాదచారులు, ద్విచక్ర వాహనదారులు తీవ్ర భయాందోళనకు గురవుతున్నారు.

---------------

హిందూస్తాన్ సమచార్ / Santhosha Laxmi