హైదరాబాద్, 30 సెప్టెంబర్ (హి.స.)

తెలంగాణలో వైద్య విద్యను అభ్యసించాలనుకునే అభ్యర్థులకు నేషనల్ మెడికల్ కమిషన్ (NMC) భారీ శుభవార్త అందించింది. రాష్ట్రంలోని ప్రభుత్వ, ప్రైవేట్ మరియు డీమ్డ్ మెడికల్ కళాశాలల్లో 2026-27 విద్యా సంవత్సరానికి సంబంధించి పీజీ (పోస్ట్ గ్రాడ్యుయేట్) మెడికల్ ప్రవేశాలకు ఎన్‌ఎంసి పచ్చజెండా ఊపింది. ఈ విద్యా సంవత్సరానికి గాను రాష్ట్రవ్యాప్తంగా మొత్తం 3,981 పీజీ మెడికల్ సీట్లను ఖరారు చేస్తూ అధికారిక సీట్ మ్యాట్రిక్స్‌ను విడుదల చేసింది.

గత ఏడాదితో పోలిస్తే ఈసారి పీజీ మెడికల్ సీట్ల సంఖ్య పెరగడం వైద్య విద్యార్థులకు ఎంతో ఊరటనిచ్చే అంశం. కొత్తగా మంజూరైన మరియు పునరుద్ధరించబడిన సీట్లతో కలుపుకుని ఈ సంఖ్య 3,981కి చేరింది. ఇందులో క్లినికల్, నాన్-క్లినికల్ మరియు డిప్లొమా కోర్సులకు సంబంధించిన ఎండీ (MD), ఎంఎస్ (MS) సీట్లు అందుబాటులో ఉండనున్నాయి.

ఎన్‌ఎంసి విడుదల చేసిన ఈ తాజా సీట్ మ్యాట్రిక్స్ ద్వారా త్వరలోనే రాష్ట్రంలో పీజీ మెడికల్ కౌన్సెలింగ్ ప్రక్రియ ఊపందుకునే అవకాశం ఉంది. సీట్ల సంఖ్య పెరగడంతో రాష్ట్రంలోని ఎంబీబీఎస్ పూర్తి చేసుకున్న విద్యార్థులకు మరింత మెరుగైన ఉన్నత విద్యా అవకాశాలు లభించనున్నాయి. వైద్య వర్గాల నుంచి ఈ నిర్ణయంపై హర్షం వ్యక్తమవుతోంది.

---------------

హిందూస్తాన్ సమచార్ / Santhosha Laxmi