హైదరాబాద్ , 15 నవంబర్ (హి.స.)

తెలంగాణ ముఖ్యమంత్రి రేవంత్రెడ్డి, ప్రధానమంత్రి నరేంద్ర మోదీతో జరిపిన సమావేశం ముగిసింది. దాదాపు గంటపాటు ఈ భేటీ కొనసాగింది. ఈ సందర్భంగా తెలంగాణ రాష్ట్ర అభివృద్ధికి సంబంధించిన పలు కీలక అంశాలను సీఎం ప్రధాని దృష్టికి తీసుకెళ్లారు.

డిసెంబర్లో నిర్వహించనున్న తెలంగాణ గ్లోబల్ ఇన్వెస్టర్స్ సమ్మిట్కు ముఖ్య అతిథిగా హాజరుకావాలని మోదీని రేవంత్రెడ్డి ఆహ్వానించారు. అలాగే రాష్ట్రంలో జరగనున్న ఖేలో ఇండియా యూత్ గేమ్స్ ప్రారంభోత్సవానికి రావాలని కోరారు. తెలంగాణలో పెట్టుబడులను పెంచడం, పారిశ్రామిక అభివృద్ధికి కేంద్రం సహకారం అందించడం వంటి అంశాలపై చర్చించారు.

మరోవైపు ఎల్నినో ప్రభావంతో భవిష్యత్తులో తలెత్తే కరువు పరిస్థితులపైనా ప్రధానితో మాట్లాడారు. రాష్ట్రానికి అవసరమైన ఆర్థిక సాయం అందించాలని విజ్ఞప్తి చేశారు. తెలంగాణలో సాగునీటి ప్రాజెక్టులకు సంబంధించిన అంశాలు, పర్యావరణ అనుమతుల సమస్యలను కూడా ప్రస్తావించినట్లు సమాచారం.

ఈ సమావేశంలో కేంద్ర మంత్రి మన్సుఖ్ మాండవీయ పాల్గొన్నారు. ముఖ్యమంత్రి వెంట రాష్ట్ర మంత్రులు ఉత్తమ్ కుమార్రెడ్డి, వాకిటి శ్రీహరి ఉన్నారు. రాష్ట్ర ప్రయోజనాల సాధనకు కేంద్ర సహకారం కోరుతూ సీఎం ఈ సమావేశంలో పలు విజ్ఞప్తులు చేసినట్లు తెలుస్తోంది.

---------------

హిందూస్తాన్ సమచార్ / పుట్టా సుమన్