హైదరాబాద్ , 15 నవంబర్ (హి.స.)

హనుమకొండ జిల్లా పర్యటనలో భాగంగా రాష్ట్ర మంత్రి సీతక్క మల్లారెడ్డిపల్లిలో పలు అభివృద్ధి కార్యక్రమాల్లో పాల్గొన్నారు. గ్రామంలో నూతనంగా నిర్మించిన గ్రామపంచాయతీ భవనాన్ని ఆమె ప్రారంభించారు. ఈ సందర్భంగా స్థానిక ప్రజాప్రతినిధులు, అధికారులు మంత్రికి స్వాగతం పలికారు.

కొత్తగా అందుబాటులోకి వచ్చిన పంచాయతీ భవనం ద్వారా గ్రామస్థులకు పరిపాలనాపరమైన సేవలు మరింత సులభంగా అందనున్నాయి. గ్రామానికి సంబంధించిన సమస్యలను పరిష్కరించుకోవడంతో పాటు ప్రభుత్వ పథకాల అమలుకు ఈ భవనం ఉపయోగపడనుంది.

అనంతరం మంత్రి సీతక్క అర్హులైన లబ్ధిదారులకు పింఛన్ల మంజూరు పత్రాలను పంపిణీ చేశారు. ప్రభుత్వ సంక్షేమ పథకాలను అర్హులైన ప్రతి ఒక్కరికీ చేరవేయడమే లక్ష్యంగా ప్రభుత్వం పనిచేస్తోందని ఈ సందర్భంగా ఆమె పేర్కొన్నారు. పేదలు, వృద్ధులు, ఇతర అర్హులకు సంక్షేమ ఫలాలు అందేలా చర్యలు తీసుకుంటున్నట్లు తెలిపారు.

మంత్రి పర్యటనతో మల్లారెడ్డిపల్లిలో సందడి నెలకొంది. ఈ కార్యక్రమంలో స్థానిక ప్రజాప్రతినిధులు, అధికారులు, గ్రామస్థులు పాల్గొన్నారు.

---------------

హిందూస్తాన్ సమచార్ / పుట్టా సుమన్