
శ్రీనగర్,, 17 నవంబర్ (హి.స.)
జమ్ముకశ్మీర్లోని కుల్గాం జిల్లాలో సోమవారం భద్రతా దళాలతో జరిగిన ఎన్కౌంటర్లో హతమైన ఉగ్రవాది ఉమర్ నిసార్ దార్ గురించి దర్యాప్తులో కీలక అంశాలు వెలుగులోకి వచ్చాయి. పాకిస్థాన్ కేంద్రంగా పనిచేస్తున్న లష్కరే తోయిబా (LeT) అనుబంధ సంస్థ 'ది రెసిస్టెన్స్ ఫ్రంట్' (TRF)లో చేరడానికి దాదాపు ఆరు నెలల ముందే, మోస్ట్ వాంటెడ్ ఉగ్రవాద కమాండర్ లతీఫ్ భట్కు ఉమర్ ఆశ్రయంతో పాటు అన్ని రకాల లాజిస్టికల్ సపోర్ట్ అందించినట్లు అధికారులు వెల్లడించారు.
గతంలో బేకరీలో బ్రెడ్ తయారీదారుడిగా పనిచేసిన ఉమర్ నిసార్ దార్, ఈ నెల 11న అఖ్రాన్ గ్రామంలో సీఆర్పీఎఫ్ (CRPF) జవాన్లపై జరిగిన దాడిలో ప్రత్యక్షంగా పాల్గొన్నాడు. ఆ దాడిలో ముగ్గురు జవాన్లు గాయపడ్డారు. అయితే, ఈ దాడికి ముందు నవంబర్ 10న ఉమర్, లతీఫ్ భట్ ఇద్దరూ కలిసి మీర్ బజార్, అఖ్రాన్, హబ్లిష్, కిలామ్ ప్రాంతాల్లో రెక్కీ నిర్వహించినట్లు సీసీటీవీ ఫుటేజీల ద్వారా దర్యాప్తు బృందాలు గుర్తించాయి. దాడి అనంతరం ఉమర్ అదృశ్యమవడంతో అతని కుటుంబ సభ్యులు కుల్గాం పోలీస్ స్టేషన్లో మిస్సింగ్ కేసు పెట్టారు. ఆ తర్వాత అతను అధికారికంగా టీఆర్ఎఫ్లో చేరినట్లు విచారణలో తేలింది.
సోమవారం లారు బైపాస్ సమీపంలో ఇద్దరు అనుమానిత యువకులు సంచరిస్తున్నారనే పక్కా సమాచారంతో ఆర్మీ, జమ్ముకశ్మీర్ పోలీస్ స్పెషల్ ఆపరేషన్స్ గ్రూప్ (SOG) సంయుక్తంగా కార్డన్ అండ్ సెర్చ్ ఆపరేషన్ చేపట్టాయి. భద్రతా బలగాలను గమనించిన ఉగ్రవాదులు సమీపంలోని యాపిల్ తోట పక్కన ఉన్న రెండు పాఠశాలల్లోకి చొరబడ్డారు. అప్పుడు పాఠశాలల్లో విద్యార్థులు ఉండటంతో, ఎలాంటి ప్రాణనష్టం జరగకుండా భద్రతా దళాలు అత్యంత చాకచక్యంగా సుమారు 90 నిమిషాల పాటు శ్రమించి చిన్నారులందరినీ సురక్షితంగా బయటకు తరలించాయి. అనంతరం జరిగిన ఎదురుకాల్పుల్లో ఉమర్ హతమవ్వగా, కశ్మీర్ లోయలో మిగిలి ఉన్న ఏకైక స్థానిక మోస్ట్ వాంటెడ్ ఉగ్రవాది లతీఫ్ భట్ గాయాలతో తప్పించుకున్నాడు.
ప్రస్తుతం లతీఫ్ భట్ ఆచూకీ కోసం కుల్గాం చుట్టుపక్కల ఉన్న డజన్ల కొద్దీ గ్రామాల్లో భద్రతా బలగాలు రెండో రోజైన మంగళవారం కూడా భారీ కూంబింగ్ నిర్వహిస్తున్నాయి. డ్రోన్లు, జాగిలాల సాయంతో అనుమానిత స్థావరాల్లో ముమ్మరంగా గాలిస్తూ, ఉగ్రవాద నెట్వర్క్ మూలాలను పెకలించే దిశగా ఉన్నతాధికారులు ఆపరేషన్ను పర్యవేక్షిస్తున్నారు.
---------------
హిందూస్తాన్ సమచార్ / Santhosha Laxmi