న్యూఢిల్లీ, 09 నవంబర్ (హి.స.)

పనిచేసే మహిళల ఉద్యోగ పురోగతికి ఎలాంటి ఆటంకాలు కలగకుండా చూడటంతో పాటు, పిల్లల పెంపకంలో తండ్రుల పాత్రను క్రియాశీలంగా మార్చేందుకు నేషనల్ కమిషన్ ఫర్ ఉమెన్ (NCW) కేంద్ర ప్రభుత్వానికి సంచలనాత్మక సిఫార్సులు చేసింది. ప్రభుత్వ మరియు ప్రైవేట్ రంగాలు రెండింట్లోనూ పనిచేసే పురుష ఉద్యోగులకు వేతనంతో కూడిన పెటర్నిటీ లీవ్ (పితృత్వ సెలవులు) తప్పనిసరిగా మంజూరు చేయాలని జాతీయ మహిళా కమిషన్ స్పష్టం చేసింది. పిల్లలు పుట్టిన తర్వాత వారి సంరక్షణ బాధ్యతలను తల్లి, తండ్రి ఇద్దరూ సమానంగా పంచుకోవాలనే ఉద్దేశంతో ఈ సూచనలు రూపకల్పన చేశారు.

శిశువు పెంపకంలో తల్లి ప్రాథమిక సంరక్షకురాలిగా, తండ్రి ద్వితీయ సంరక్షకుడిగా బాధ్యతలు పంచుకునేలా ఒక ప్రత్యేక నమూనాను అమలు చేయాలని కమిషన్ పేర్కొంది. పిల్లల సంరక్షణ కేవలం తల్లి బాధ్యతే కాదనే దృక్పథాన్ని సమాజంలో పెంచేందుకు, చైల్డ్ కేర్ లీవ్‌లను లింగభేదం లేకుండా తండ్రులకు కూడా వర్తింపజేయాలని నివేదికలో ప్రతిపాదించింది. ప్రస్తుతం కేవలం కొద్దిమంది కేంద్ర ప్రభుత్వ ఉద్యోగులకు మాత్రమే పరిమితమైన పితృత్వ సెలవుల సదుపాయాన్ని ప్రైవేట్ రంగానికి కూడా దశలవారీగా వర్తింపజేయాలని కోరింది.

సాధారణంగా బిడ్డ పుట్టిన తర్వాత ఇంట్లో పెంపకం బాధ్యతలన్నీ మహిళపైనే పడటం వల్ల వారి ఉద్యోగాలకు విరామం రావడం లేదా కెరీర్ పూర్తిగా ఆగిపోవడం జరుగుతోంది. తండ్రులు కూడా ఇంటి వద్ద బాధ్యతల్లో భాగస్వాములయితే మహిళలు తమ ఉద్యోగాల్లో నిరంతరంగా కొనసాగడానికి మార్గం సుగమమవుతుందని కమిషన్ భావించింది. దీనికితోడు దత్తత తీసుకున్న తల్లులకు ఇచ్చే సెలవులను 26 వారాలకు పెంచాలని మరియు అసంఘటిత రంగంలోని వర్కర్లకు కూడా ఈ సౌకర్యాలను విస్తరించాలని కోరింది. ఈ ప్రతిపాదనలు అమలులోకి వస్తే భారతీయ పని సంస్కృతిలో సమూల మార్పులు వస్తాయి.

---------------

హిందూస్తాన్ సమచార్ / Santhosha Laxmi