కడప, 10 ఏప్రిల్ (హి.స.)

కడప జిల్లా ఖాజీపేట మండలంలో మనసును కలచివేసే దారుణ ఘటన)చోటుచేసుకుంది. ప్రేమ పేరుతో వెంటపడి, చివరకు బాలిక ప్రాణాలనే బలిగొన్న ఓ ప్రేమోన్మాది ఘాతుకం స్థానికంగా తీవ్ర కలకలం రేపింది. ప్రేమించలేదనే కోపంతో ఓ ఉన్మాది రెచ్చిపోయాడు. తనను పెళ్లి చేసుకోవడానికి నిరాకరించిందనే కక్షతో ఓ బాలికను అత్యంత దారుణంగా గొంతు కోసి హతమార్చాడు. ఈ ఘటన ఖాజీపేట మండల పరిధిలో చోటుచేసుకుంది. ఈ ఘటనపై కడప జిల్లా పోలీసులు కేసు నమోదు చేసి దర్యాప్తు చేపట్టారు.

ఏం జరిగిందంటే..

పోలీసులు తెలిపిన వివరాల ప్రకారం.. కడప జిల్లాలోని ఖాజీపేట మండలం ఆంజనేయకోట్టాలు గ్రామానికి చెందిన ఆవుల వెంకటేశ్ అనే యువకుడు, అదే మండలం ఖాజీపేట అగ్రహారానికి చెందిన ఓ బాలికను కొంతకాలంగా ప్రేమ పేరుతో వేధిస్తున్నాడు. ఆమెను పెళ్లి చేసుకోవాలని ఒత్తిడి చేసేవాడు. అయితే, అందుకు బాలిక నిరాకరించడంతో ఆమెపై కక్ష పెంచుకున్నాడు.

ఘాతుకానికి ఒడిగట్టిన తీరు..

శుక్రవారం నాడు బాలిక ఒంటరిగా ఉన్న సమయం చూసి వెంకటేశ్ ఆమెపై దాడికి దిగాడు. తన వెంట తెచ్చుకున్న పదునైన ఆయుధంతో బాలిక గొంతు కోశాడు. తీవ్ర రక్తస్రావంతో కుప్పకూలిన ఆమెను స్థానికులు, కుటుంబ సభ్యులు గమనించారు. హుటాహుటిన బాలికను చికిత్స నిమిత్తం కడప రిమ్స్ ఆస్పత్రికి తరలించే ప్రయత్నం చేశారు. గాయం తీవ్రత ఎక్కువగా ఉండటంతో, ఆస్పత్రికి చేరుకోకముందే బాలిక మార్గమధ్యంలోనే ప్రాణాలు విడిచింది. నిండు నూరేళ్ల భవిష్యత్తు ఉన్న బాలిక ఇలా ఉన్మాది చేతిలో బలికావడంపై బంధువులు, స్థానికులు కన్నీరుమున్నీరవుతున్నారు.

పోలీసుల అదుపులో నిందితుడు..

ఈ ఘటనపై సమాచారం అందుకున్న ఖాజీపేట పోలీసులు వెంటనే రంగంలోకి దిగారు. పరారీలో ఉన్న ప్రేమోన్మాది ఆవుల వెంకటేశ్ను గాలించి, స్వల్ప వ్యవధిలోనే అదుపులోకి తీసుకున్నారు. నిందితుడిపై హత్య కేసు, హత్యకు గురైన బాలిక మైనర్ కావడంతో పోక్సో (POCSO) చట్టం కింద చర్యలు తీసుకునే దిశగా పోలీసులు విచారణ జరుపుతున్నారు. ఈ హత్య వార్త తెలియడంతో ఖాజీపేట అగ్రహారం, ఆంజనేయకోట్టాలు గ్రామాల్లో ఉద్రిక్తత నెలకొంది. ఎలాంటి అవాంఛనీయ సంఘటనలు జరగకుండా పోలీసులు భద్రతను పర్యవేక్షిస్తున్నారు. ప్రేమ పేరుతో యువతులపై జరుగుతున్న ఇలాంటి దాడులు సమాజానికి ఆందోళన కలిగిస్తున్నాయని పలువురు అంటున్నారు. మైనర్ల భద్రత విషయంలో తల్లిదండ్రులు, ప్రభుత్వం మరింత అప్రమత్తంగా ఉండాల్సిన అవసరం ఉందని పలువురు చెబుతున్నారు. నిందితుడికి కఠిన శిక్ష పడాలని బాధితురాలి కుటుంబ సభ్యులు డిమాండ్ చేస్తున్నారు

---------------

హిందూస్తాన్ సమచార్ / నిత్తల రాజీవ