శ్రీశైలం, 28 ఏప్రిల్ (హి.స.)

శ్రీశైలంలోని ప్రభుత్వ పాలిటెక్నిక్ కళాశాల (Polytechnic College) ఆవరణలో రెండు చిరుత పులులు (Leopards) సంచరించడం స్థానికంగా తీవ్ర కలకలం రేపింది. అర్ధరాత్రి సమయంలో కళాశాల ప్రాంగణంలోకి ప్రవేశించిన ఈ క్రూర మృగాలు స్వేచ్ఛగా విహరిస్తున్న దృశ్యాలు అక్కడి సీసీ కెమెరాల్లో రికార్డయ్యాయి. అయితే, ఆ సమయంలో కళాశాలకు సెలవులు ఉండటం, విద్యార్థులు ఎవరూ ఆవరణలో లేకపోవడంతో పెద్ద ప్రమాదం తప్పిందని, అధికారులు ఊపిరి పీల్చుకున్నారని చెప్పవచ్చు. విధుల్లో ఉన్న వాచ్మెన్ను గమనించిన చిరుతలు లోపలికి రాకుండానే వెనుదిరగడం గమనార్హం.

ఈ ఘటనతో శ్రీశైల క్షేత్ర పరిసరాల్లో నివసించే ప్రజలు, విద్యార్థులు తీవ్ర భయాందోళనకు గురవుతున్నారు. గత కొన్ని రోజులుగా ఈ ప్రాంతంలో వన్యమృగాల సంచారం నిత్యకృత్యమైందని, అటవీ శాఖ అధికారులు తక్షణమే స్పందించి నిఘా పెంచాలని స్థానికులు కోరుతున్నారు. కళాశాల ఆవరణలో బోన్లు ఏర్పాటు చేసి ఆ చిరుతలను బంధించాలని, భవిష్యత్తులో ఇలాంటి సంఘటనలు పునరావృతం కాకుండా తగిన రక్షణ చర్యలు చేపట్టాలని వారు విజ్ఞప్తి చేస్తున్నారు.

---------------

హిందూస్తాన్ సమచార్ / SANDHYA PRASADA PV